Според најновите податоци на Државниот завод за статистика, во првите три месеци од 2026 година најголема побарувачка на работници имало во услужните дејности и продажбата.
Во овој период, стапката на слободни работни места изнесувала 2,07%. Најмногу непополнети позиции имало во групата „работници во услужни дејности и продажба“ – вкупно 2.346 работни места. Тоа покажува дека најмногу се барале луѓе за работа во трговија, угостителство, услуги и директна работа со клиенти.
По сектори, најголем недостиг од кадар има во угостителството и сместувањето, каде стапката на слободни работни места достигнала 4,94%. Ова е вообичаено за овој период од годината, бидејќи побарувачката расте пред летната туристичка сезона.
Најмал недостиг има во секторот за енергија (струја, гас, пареа и климатизација), каде стапката е само 0,15%.
Регионално, најмногу слободни работни места имало во Вардарскиот Регион – 2,28%. Исто така, малите и средни фирми со 10 до 49 вработени најчесто барале нови работници, со стапка од 3,05%.
Податоците генерално покажуваат дека најголем недостиг од работна сила има во сектори кои зависат од директен контакт со луѓе, како продажба и угостителство. Дел од причините се сезонската побарувачка и заминување на работници во странство.
Државниот завод за статистика нагласува дека овие податоци се објавуваат според нова национална класификација усогласена со правилата на ЕУ и Евростат.
