Финансиското друштво „Креди Јес“ е затворено по одземање на дозволата за работа од Министерството за финансии, но граѓаните кои имаат активни кредити и понатаму се должни редовно да ги отплаќаат своите обврски, со цел да избегнат дополнителни камати и зголемување на долгот.
Од Министерството за финансии појаснуваат дека важечката законска регулатива не предвидува отпис на долгови во вакви случаи, поради што обврските преземени со договорите остануваат целосно на сила.
Граѓаните кои сметаат дека биле оштетени од работењето на друштвото имаат право да покренат судска постапка и да ги оспорат договорите пред надлежен суд, доколку постојат индиции за прекршување на договорните одредби.
Со одземањето на лиценцата, „Креди Јес“ повеќе нема право да одобрува нови кредити, но согласно законот може да продолжи со наплата на постојните побарувања. Воедно, друштвото има рок од 15 дена да поднесе жалба, по што може да започне постапка за ликвидација или стечај.
Во случај на ликвидација или стечај, од Министерството нагласуваат дека обврските на граѓаните остануваат валидни и мора да се подмируваат согласно склучените договори.
Дозволата за работа на „Креди Јес“ е одземена поради два утврдени прекршоци. Првиот се однесува на недоставување на финансиски и ревизорски извештаи во законскиот рок, додека вториот е поврзан со неправилно пресметување на годишната стапка на вкупни трошоци, над дозволениот максимум.
Со затворањето на финансиското друштво се затвораат околу 40 филијали низ државата, а без работа остануваат над 100 вработени. „Креди Јес“ беше присутен на пазарот на финансиски услуги од 2019 година.
…
