Во текот на вчерашниот ден во различни делови на Скопје биле пронајдени телата на тројца починати мажи, потврдија од Министерството за внатрешни работи. Засега не се соопштуваат информации за причините за смртта, а надлежните институции работат на расчистување на сите околности.
Првиот случај бил пријавен во 08:40 часот, кога во СВР Скопје било пријавено дека во скопското село Кучково, под патничко возило „Опел“ со скопски регистарски таблички, било пронајдено телото на 67-годишниот Ц.Р. од селото Волково.
На местото пристигнала екипа на Итна медицинска помош, при што лекар констатирал смрт.
Неколку часа подоцна, во попладневните часови, во СВР Скопје било пријавено дека во хотелска соба на подрачјето на Бит Пазар е пронајден починат 63-годишниот С.Е., државјанин на Турција кој престојувал во земјава.
Според првичните информации, лекар од Итна медицинска помош констатирал смрт, при што не биле забележани видливи траги на насилство.
Третиот случај бил регистриран во вечерните часови. Околу 20 часот во полицијата било пријавено дека во дом на подрачјето на Општина Центар е пронајден починат 69-годишниот Б.О.
Од Обвинителството и полицијата засега не откриваат дополнителни детали за причините за смртта на тројцата мажи. По наредба на јавен обвинител се преземаат понатамошни дејствија за утврдување на сите факти и околности поврзани со случаите.
