Една од најпознатите и најфотографирани плажи во Грција, Навагио на островот Закинтос, ќе остане затворена за посетители најмалку до 31 октомври 2026 година.
Грчките власти ја продолжија забраната поради зголемениот ризик од одрони и лизгање на земјиштето од стрмните карпи што ја опкружуваат плажата. Поради безбедносни причини, на туристите не им е дозволено да се симнуваат на плажата, ниту да се капат, а бродовите мора да држат оддалеченост од најмалку 50 метри од брегот.
За прекршување на правилата се предвидени и парични казни.
Плажата Навагио е светски позната по бродоломот „Панагиотис“, кој се наоѓа на нејзиниот песок од 1980-тите години и претставува една од најголемите туристички атракции во Грција.
Во 2018 година, неколку посетители беа повредени при уривање на дел од карпите, по што властите воведоа построги мерки за заштита и контролиран пристап.
И покрај затворањето, туристите ќе можат да ја гледаат плажата од означени видиковци, а бродските тури ќе продолжат, но само на безбедна дистанца.
