Протестите во Албанија продолжуваат да се интензивираат, а незадоволството од владата на премиерот Еди Рама добива нови размери. Илјадници граѓани и денеска се собраа во центарот на Тирана, каде веќе две недели по ред се одржуваат масовни демонстрации под слоганот „Револуција Фламинго“.
Учесниците бараат политичка одговорност, поголема транспарентност во работењето на институциите и преиспитување на неколку големи инвестициски проекти долж албанското крајбрежје.
На плоштадот „Скендербег“ и по улиците на главниот град одекнуваа паролите „Рама оставка“ и „Рама во затвор“, додека демонстрантите маршираа кон булеварот „Маченици на нацијата“. На протестот беа забележани и знамиња на САД, Германија и Обединетото Кралство, кои учесниците ги опишаа како симбол на нивните барања за посилни демократски институции и владеење на правото.
Најголемо внимание предизвика протестната акција во селото Рјол, во близина на Велипоја, каде околу 200 жители и активисти ги урнаа металните огради и бодликавата жица поставени околу локацијата каде е планирана изградба на луксузен туристички комплекс поврзан со инвестиција на Џаред Кушнер, зетот на американскиот претседател Доналд Трамп.
Жителите тврдат дека земјиштето на кое е предвидена изградбата им припаѓа ним и се спротивставуваат на реализацијата на проектот во регионот кој важи за едно од најатрактивните крајбрежни подрачја во Албанија, познат по долгите песочни плажи и боровите шуми.
Носејќи албански знамиња и извикувајќи „Револуција“, демонстрантите ги отстранија заштитните бариери околу градилиштето, испраќајќи порака дека нема да дозволат, како што велат, приватни интереси да бидат ставени пред интересите на локалното население.
Дополнителна симболика на протестите беше поставувањето десетици чевли пред зградата на Владата во Тирана. Организаторите објаснија дека тие ги претставуваат илјадниците Албанци кои во последните години ја напуштиле државата во потрага по подобар живот и економска сигурност.
Меѓу присутните беше и Флорина Цани, мајка на 14-годишниот Мартин Цани, кој минатата година трагично го загуби животот по инцидент со врсник во Тирана. Нејзиното присуство многумина го протолкуваа како симбол на поширокото незадоволство од институциите и барањето за правда и одговорност.
Иако организаторите постојано апелираат протестите да останат мирни, последните случувања покажуваат дека тензиите во земјата растат. Урнувањето на оградите околу спорниот проект претставува најсериозен инцидент од почетокот на протестите и дополнително го зголемува притисокот врз владата на Еди Рама.
Политичките аналитичари оценуваат дека протестното движење прераснува во еден од најголемите предизвици за актуелната власт во последните години, особено во период кога Албанија се подготвува за летната туристичка сезона, која претставува еден од клучните двигатели на националната економија.
