Силно невреме проследено со пороен дожд, град и бурни налети на ветер денеска зафати повеќе делови од Хрватска, предизвикувајќи материјална штета, поплавени улици и бројни интервенции на пожарникарите. Најпогодени беа северните региони на земјата, додека Државниот хидрометеоролошки институт (ДХМЗ) издаде црвен аларм за делови од источна Хрватска поради опасност од ветрови со ураганска сила.
Невремето прво ја зафати Вараждинската жупанија, каде околу 16 часот започна силен дожд проследен со град со големина на орев и силен ветер. Бурата за кратко време се прошири од западниот кон централниот дел на жупанијата.
Командантот на Противпожарната служба во Вараждин, Марио Рогина, изјави дека до раните вечерни часови биле примени околу 40 пријави за поплавени подруми и патишта.
Пожарникарите интервенирале и поради паднати дрвја на сообраќајници, а едно дрво паднало врз паркиран автомобил во близина на Нови Мароф.
Силното невреме ги зафати и делови од Меѓумурската жупанија, каде биле регистрирани обилни врнежи, грмежи и силни налети на ветер.
Особено драматична била ситуацијата во Јакшиќ, во Пожешко-Славонската жупанија, каде ветерот буквално откорнал голем дел од покривот на Основното училиште „Младост“.
„Сѐ се случи за неколку моменти. Огромен бел облак се надвисна над местото, а потоа започна силен ветер кој го однесе покривот од училиштето“, изјавиле жители за локалните медиуми.
Според градоначалникот Ивица Ковачевиќ, засега нема информации за поголеми оштетувања на други објекти во општината.
Обилните врнежи создадоа проблеми и во Копривница, каде делови од градот накратко беа под вода. Директорот на комуналното претпријатие КЦ Воде, Здравко Петрас, објасни дека најголем дел од системот за одводнување функционирал според очекувањата, а привремените поплавувања биле предизвикани од затнати шахти и одводи полни со гранки и лисја кои ги донел ветерот.
Тој посочи дека новите базени за задржување на атмосферските води успешно ја апсорбирале огромната количина дожд и спречиле многу поголеми поплави.
Во меѓувреме, ДХМЗ издаде највисоко, црвено предупредување за регионот на Осиек, каде се очекува нагла промена на времето и налети на ветер посилни од 90 километри на час.
Метеоролозите предупредуваат на опасност од искорнати дрвја, летечки предмети, прекини во сообраќајот и можни проблеми со снабдувањето со електрична енергија.
Портокалов аларм е активиран за регионот на Загреб поради опасност од силни грмотевични невремиња, град и обилни врнежи, додека за Карловачката област е издадено жолто предупредување.
Хрватските служби апелираат граѓаните да избегнуваат движење на отворено за време на невремето и да бидат особено внимателни во шумски, планински и други изложени подрачја.
Според прогнозите, нестабилното време ќе продолжи и во текот на ноќта, а локално се очекуваат нови грмотевични процеси и силни ветрови.
