Амбасадата на Бугарија во Скопје реагираше по најавите за блокада на трите гранични премини меѓу Македонија и Бугарија од страна на бугарската фондација „Македонија“, упатувајќи повик да не се создаваат пречки во сообраќајот и да не се користат квалификации кои, според нив, дополнително ги продлабочуваат поделбите.
Во соопштението, Амбасадата посочува дека е непродуктивно бугарски организации да се означуваат како „антимакедонски“ поради нивните ставови за билатералните односи и политиките на властите во Скопје.
„Плурализмот е карактеристична црта на демократијата и неговата манифестација не е насочена против никого, туку има за цел да отвори меѓуопштествен дијалог како предуслов за подобро разбирање“, наведуваат од Амбасадата.
Истовремено, од бугарската дипломатска мисија ја поддржуваат можноста за мирен граѓански протест, но апелираат да не се блокираат граничните премини и патните правци меѓу двете држави.
Според нив, интересот на Бугарија е насочен кон продлабочување на контактите меѓу граѓаните, економската соработка, трговската размена и културните врски меѓу двете соседни земји.
Од Амбасадата оценуваат дека изразувањето на незадоволството и загриженоста во бугарското општество треба да има конструктивен и европски карактер, со цел да се придонесе кон подобрување на односите и градење заедничка европска иднина.
…
