Чешкиот премиер Андреј Бабиш и словачкиот премиер Роберт Фицо упатија повик за поголема дипломатска активност и што поскоро прекин на војната во Украина, оценувајќи дека продолжувањето на конфликтот ќе донесе уште поголеми човечки и материјални последици.
Говорејќи на третата Меѓународна конференција за реконструкција на Украина во Гдањск, Бабиш истакна дека фокусот не треба да биде само на обновата на земјата, туку и на начините за завршување на војната.
„Војната не е виртуелна. Таа е застрашувачки реална. Тоа значи уништени домови, вдовици и сирачиња. Украина веќе плати огромна цена“, рече Бабиш, додавајќи дека секоја нова ескалација носи нови жртви и дополнителни разурнувања.
Тој оцени дека е неопходно да се разговара за примирје и мировен договор, бидејќи, како што нагласи, реконструкцијата на земјата е тешко остварлива додека борбите продолжуваат.
Поддршка за ваквиот став даде и словачкиот премиер Роберт Фицо, кој повторно ја нагласи потребата од дипломатско решение на конфликтот.
„Европската Унија треба да покрене мировни иницијативи. Нема воено решение за војната во Украина“, изјави Фицо.
Тој предупреди дека секое понатамошно уништување ќе ја отежне идната обнова на земјата и ќе создаде дополнителни пречки во процесот на европска интеграција на Украина.
Според двајцата премиери, прекинот на воените дејствија е клучен предуслов за стабилизација, реконструкција и долгорочен развој на Украина.
…
