Тензиите меѓу Соединетите Американски Држави и Иран повторно се заострија, откако американската војска изврши напади врз ирански воени цели, а иранската Исламска револуционерна гарда соопшти дека веднаш возвратила.
Американската централна команда (CENTCOM) соопшти дека нападите биле насочени кон складишта за ракети и беспилотни летала, како и кон радарски позиции на иранскиот брег. Според Вашингтон, операцијата била одговор на претходен напад со дрон врз танкер во Персискиот Залив.
Во меѓувреме, иранските државни медиуми објавија дека во близина на пристаништето Сирик, на југот на земјата, одекнала силна експлозија.
Во официјално соопштение, Исламската револуционерна гарда ги обвини САД за кршење на постигнатите договори и наведе дека американските сили извршиле воздушен напад под изговор дека брод користел неовластена рута во Ормутскиот Теснец.
Иранската страна тврди дека нивната морнарица веднаш одговорила со напад врз американски воени позиции во регионот, но засега не соопшти детали за погодените цели или евентуалните последици. Од Пентагон сè уште нема официјален коментар за овие тврдења.
„Доколку агресијата се повтори, нашиот одговор ќе биде значително пообемен“, предупреди Исламската револуционерна гарда.
Ова е прв директен американски напад по потпишувањето на Меморандумот за разбирање, познат како Исламабадска декларација, кој го потпишаа американскиот претседател Доналд Трамп и иранскиот претседател Масуд Пезешкијан.
Со документот беше договорен прекин на воените операции, отворање на Ормутскиот Теснец за трговска пловидба, олеснување на извозот на иранска нафта и почеток на процесот за одмрзнување на дел од иранскиот имот во странство.
И покрај договорената рамка за мировни преговори, најновите случувања отвораат прашања дали договорот ќе опстане или регионот повторно се движи кон нова ескалација на конфликтот.
…
