ВЛЕН одбележа 24 месеци учество во Владата под мотото „Транспарентност и отчетност“, истакнувајќи дека изминатите две години се обележани со конкретни реформи, реализирани проекти и политики насочени кон подобрување на животот на граѓаните.
Од ВЛЕН велат дека пред две години ја презеле одговорноста да ја вратат довербата на граѓаните во политиката преку работа, а не преку празни ветувања. Според нив, во изминатиот период биле реализирани реформи и проекти кои со години останувале само на хартија.
Во соопштението се наведува дека се донесени закони од стратешко значење, реализирани се инвестиции во општините со мнозинско албанско население, а обезбедена е поддршка за економијата, образованието, здравството, земјоделството и локалниот развој. Посочуваат и дека инфраструктурните проекти веќе носат видливи промени на терен.
Од ВЛЕН нагласуваат дека значаен дел од нивното владеење е и унапредувањето на застапеноста и улогата на Албанците во државните институции, како и зајакнувањето на нивниот глас во процесите на донесување одлуки.
„Билансот од овие две години покажува дека промените не се градат со реторика, туку со работа, одговорност и конкретни резултати. Тоа е стандардот што ВЛЕН го воспостави во владеењето“, наведуваат од партијата.
Од ВЛЕН порачуваат дека и во наредниот период ќе продолжат со истата насока – со поголема одговорност, поголема ефикасност и повеќе резултати во интерес на сите граѓани.
