Двајца загинаа, а една жена е повредена во шумски пожар што зафати куќа во близина на селото Лити, на околу 25 километри од Солун.
Пожарот избувнал во вторникот попладне во ниска вегетација, но поради силниот ветер брзо се проширил и ја зафатил куќата, која била опкружена со огнената стихија.
При интервенцијата, пожарникарите го пронашле телото на 62-годишен маж во близина на куќата, додека во внатрешноста било откриено телото на неговиот 12-годишен син.
Според грчките медиуми, телото на детето било пронајдено под прозорец во една од просториите. Врз него се урнал покривот на куќата, што дополнително ја отежнало трагедијата.
Од истата локација била спасена 40-годишната мајка, која се здобила со изгореници и е пренесена на лекување.
Претходно, властите издале наредба за евакуација на жителите на селото и ги упатиле кон блиското спортско игралиште. Куќата во која се случила трагедијата била изолирана, иако пристапот до селото не бил отежнат поради постоењето на патна инфраструктура.
Научниците предупредуваат дека Грција и другите медитерански земји се сè поранливи на шумски пожари како последица на климатските промени, кои придонесуваат за потопли, посуви и поекстремни летни сезони.
…
