Голем пожар избувна попладнево во објект на Јужен булевар во скопската Општина Кисела Вода, во непосредна близина на Пазарната инспекција и на околу еден километар од центарот на Скопје.
Според директорот на Дирекцијата за заштита и спасување (ДЗС), Стојанче Ангелов, гори магацин или друг деловен објект, а од местото на пожарот се слушале силни пукотници, кои, според првичните информации, најверојатно се предизвикани од електрични инсталации.
„Од запалениот објект се слушаа пукотници, најверојатно од електрична енергија. Црниот чад се гледа од голема далечина“, изјави Ангелов.
На терен веднаш интервенирала Бригадата за противпожарна заштита на Град Скопје, која со повеќе противпожарни возила се обидува да го локализира огнот и да спречи негово ширење кон околните објекти.
На местото на настанот се наоѓа и екипа на Итната медицинска помош, а поради опасноста од ширење на пожарот, се врши и сечење на дрвја во непосредна близина на опожарениот објект за да се олесни интервенцијата на пожарникарите.
Очевидци велат дека густ црн чад се издига високо над градот и е видлив од повеќе делови на Скопје, додека мирисот на изгорено се чувствува низ целата населба Кисела Вода.
Засега нема официјални информации дали има повредени лица или колкава е материјалната штета.
Инаку, оваа локација и претходно беше зафатена од голем пожар. Во септември 2022 година изгореа неколку бараки во близина на Рампа, по што неколку месеци подоцна на нивното место започна изградба на нов објект.
Повеќе информации за причините за пожарот и евентуалните последици се очекуваат во текот на денот.
