Македонските аеродроми бележат историски раст на бројот на патници. Во првите шест месеци од 2026 година, Меѓународниот аеродром „Скопје“ и аеродромот „Св. Апостол Павле“ во Охрид опслужиле вкупно 1.955.648 патници, што претставува зголемување од 28 отсто во споредба со истиот период минатата година.
Во периодот јануари–јуни биле реализирани 13.167 авионски летови, односно 7,6 отсто повеќе во однос на лани. Само во јуни, двата аеродрома регистрирале 374.714 патници, што е раст од 15,6 проценти.
Од ТАВ Македонија оценуваат дека зголемениот број патници е резултат на подобрената воздушна поврзаност, проширувањето на мрежата на дестинации и зголемениот интерес на авиокомпаниите за македонскиот пазар.
„Растот од 28 проценти во бројот на патници е потврда дека македонските аеродроми се движат кон силен и одржлив развој“, посочуваат од компанијата.
Најфреквентна дестинација од скопскиот аеродром во првата половина од годината бил Истанбул, со најголем удел во патничкиот сообраќај. Следуваат германските градови Минхен Меминген, Дортмунд и Франкфурт, како и Базел и Цирих.
Најмногу директни летови од Скопје има кон Германија, Турција, Швајцарија, Италија и Шведска.
Меѓународниот аеродром „Скопје“ во овој период опслужил 1.833.010 патници, што е раст од 28,6 отсто, додека охридскиот аеродром бележи зголемување од 18,2 проценти со 122.638 патници.
Со ваквиот тренд, македонските аеродроми ја продолжуваат позитивната динамика и се приближуваат до нови рекордни резултати во воздушниот сообраќај.
…
