Прилеп е меѓу првите градови во државата каде што е отворен Центар за услуги на Министерството за дигитална трансформација, со што граѓаните ќе добијат побрз, поедноставен и поефикасен пристап до голем број јавни услуги.
Градоначалникот Дејан Проданоски, заедно со министерот за дигитална трансформација Стефан Андоновски, денеска официјално го промовираа новиот Центар за услуги, кој функционира според принципот „една врата“ и е сместен во просториите на Општина Прилеп.
„Со отворањето на оваа канцеларија направивме уште еден важен чекор кон помодерна, поефикасна и подостапна јавна администрација. Ова беше едно од нашите ветувања – да им го олесниме секојдневието на граѓаните и да ги поедноставиме административните постапки“, истакна Проданоски.
Тој појасни дека преку Националниот портал за е-услуги, граѓаните ќе можат да користат повеќе од 350 услуги, додека компаниите ќе имаат пристап до над 700 услуги, со стручна поддршка од вработените во Центарот.
Според него, доволно е граѓаните да дојдат со лична карта, а службениците ќе им помогнат да поднесат барања и да добијат електронски документи, како што се изводи од Матичната книга на родените, уверенија и други јавни исправи.
Проданоски нагласи дека отворањето на Центарот е резултат на успешната соработка меѓу локалната и централната власт.
„Пред неколку месеци го најавивме овој проект, а денес покажуваме дека кога постои вистинско партнерство, резултатите не изостануваат. Работиме по принципот ‘ветено – сторено’, создавајќи институции што се поефикасни и во служба на граѓаните“, рече тој.
Градоначалникот упати благодарност до министерот Андоновски и Министерството за дигитална трансформација за поддршката, оценувајќи дека Центарот ќе донесе конкретни придобивки за прилепчани.
Во рамки на посетата, Министерството за дигитална трансформација донираше и 20 нови компјутери за СОУ „Ристе Ристески – Ричко“, со цел да се подобрат условите за настава и учениците да стекнуваат современи дигитални знаења и вештини.
Проданоски порача дека Општина Прилеп ќе продолжи, во соработка со Владата и ресорното министерство, да инвестира во дигитализација, модернизација на јавните услуги и образованието, со цел да обезбеди поквалитетни услуги и подобар живот за граѓаните.
…
