Во периоди на големи летни горештини, многумина навечер ги отвораат прозорците во дневната соба или спалната со надеж дека ќе ја исфрлат топлината насобрана во текот на денот. Но, експертите предупредуваат дека само отворањето на ниските прозорци често не е доволно, бидејќи најтоплиот воздух останува заробен во горните делови од домот.
Решението, според стручњаците за природна вентилација, е едноставно – комбинирано отворање на долен и горен прозорец. На тој начин се создава природно струење на воздухот кое може значително да ја намали температурата во просториите без користење клима-уред и дополнителна потрошувачка на електрична енергија.
Причината лежи во природниот процес познат како „ефект на оџак“. Топлиот воздух е полесен и природно се движи нагоре. Кога ќе му се овозможи излез преку отвор на повисока точка, како кровен прозорец или прозорец на горен кат, низ долните отвори влегува посвеж воздух и се создава постојана циркулација.
Истражување спроведено во експерименталната куќа „Maison Air et Lumière“ во близина на Париз покажало дека природната вентилација може да ја намали температурата во просториите во просек за околу пет степени Целзиусови во летните периоди.
Практичните искуства покажуваат дека со правилно проветрување во текот на најстудениот дел од ноќта, температурата во домот може да се намали за три до шест степени, без дополнителни трошоци и без бучава од разладни уреди.
Дури и оние кои немаат кровен прозорец можат да го применат истиот принцип. Отвор на врвот од скалиште, прозорец на горен кат или мал отвор во бањата може да послужи како излез за топлиот воздух. Со истовремено отворање на прозорец на пониско ниво се создава природен проток кој помага во разладувањето.
Во становите каде што нема разлика во висината на прозорците, експертите препорачуваат таканаречена вкрстена вентилација – отворање прозорци на спротивни страни од домот за да може воздухот слободно да поминува низ просториите.
Најдобар ефект се постигнува кога проветрувањето се прави откако надворешната температура ќе падне под температурата во домот, најчесто по 22 часот. Наутро прозорците треба повторно да се затворат за да се задржи свежината што се насобрала во текот на ноќта.
Сепак, оваа метода има ограничувања. За време на тропски ноќи, кога температурата и навечер останува над 25 степени, природната вентилација не може целосно да ја замени климата, бидејќи воздухот надвор не е доволно студен за ефикасно ладење.
Експертите советуваат дека правилното користење на прозорците може значително да помогне во намалување на топлината во домот и да ја намали потребата од постојано вклучување на клима-уредите.
…
