Умерен земјотрес со јачина од 3,6 степени според Рихтеровата скала утринава во 6:29 часот го погоди подрачјето во близина на Сисак, соопшти Хрватската сеизмолошка служба.
Според првичните информации, епицентарот бил на длабочина од околу девет километри, а интензитетот во епицентарот достигнал IV степен според ЕМС скалата. Поради релативно малата длабочина, потресот бил силно почувствуван во Сисак и околните населени места.
Граѓаните на платформата на EMSC споделија бројни сведоштва, опишувајќи силна татнеж проследена со тресење на домовите.
„Се слушна силна татнеж и силно затресе. Сè ѕвонеше низ станот“, напиша жител на Тополовац.
Друг жител од Горно Комарево опиша дека чувството било „како да експлодирала бомба, по што следувала долга татнеж“.
Потресот бил почувствуван и во делови од Загреб, како и во одредени подрачја на Босна и Херцеговина. Жители на главниот град на Хрватска наведуваат дека тресењето траело неколку секунди.
Засега нема информации за повредени лица или причинета материјална штета, а надлежните служби продолжуваат да ја следат состојбата.
…
