Во периоди на високи температури, повеќето луѓе се фокусираат на внесување доволно вода, но лекарите предупредуваат дека со потењето организмот губи и важни електролити како натриум, калиум и хлориди.
Овие минерали имаат значајна улога во правилното функционирање на мускулите, нервниот систем и одржувањето на балансот на течности во телото. Недостатокот на електролити поради обилно потење може да предизвика замор, вртоглавица, главоболка, грчеви во мускулите и мачнина.
Токму затоа, експертите посочуваат дека за време на големи горештини не е важно само колку течности внесуваме, туку и каква храна консумираме.
Германскиот лекар Томас Кипер од Универзитетската болница RWTH Ахен советува дека повремена порција посолен помфрит може да помогне во надополнување на изгубениот натриум поради потењето.
Сепак, тој нагласува дека тоа не значи дека брзата храна станува здрава или дека треба да се јаде често и во големи количини. Поентата е дека телото по губење на многу течности и минерали има потреба од нивна надокнада, а умерено солената храна може да биде еден од начините.
Покрај солената храна, лекарите препорачуваат и намирници богати со вода и минерали, како јогурт, кокосова вода, зелена салата, лубеница и краставица.
За луѓето кои многу се потат, работат на отворено или долго време престојуваат на сонце, корисни можат да бидат и минерална вода, супи и раствори за надополнување електролити.
Експертите потсетуваат дека најважно за време на топлотните бранови е да се одржува рамнотежа – доволно течности, разновидна исхрана и внес на минерали кои организмот ги губи преку потењето.
Помфритот, според лекарите, не е „лек против жештините“, но мала количина посолена храна во одредени ситуации може да помогне при губење на електролити.
…
