Италија засега нема да ги укине повторно воведените гранични контроли со Шпанија, и покрај барањето од Мадрид мерката да биде повлечена до 9 август.
Италијанската премиерка Џорџа Мелони порача дека Рим не прифаќа ултиматуми или наредби од други држави кога станува збор за националната безбедност и контролата на границите.
Од кабинетот на Мелони соопштија дека Италија најмалку до 15 август нема да ја преиспитува одлуката за задржување на контролите. Според италијанската Влада, причина за тоа се стравувањата од можен нов мигрантски бран во шпанската енклава Сеута.
Италија на 1 август привремено ги врати граничните проверки во воздушниот и поморскиот сообраќај со Шпанија. Мерката главно се однесува на насочени проверки на државјани на земји кои не се членки на Европската Унија и кои пристигнуваат од Шпанија, со цел да се провери дали ги исполнуваат условите за влез во Италија.
За шпанските и другите граѓани на ЕУ не се воведени дополнителни бирократски пречки при патувањето.
Одлуката на Рим следува по мигрантската криза во Сеута, каде во краток период пристигна голем број мигранти од Мароко. Италијанската Влада стравува дека последиците од кризата би можеле да се прелеат и во други европски земји.
Мадрид, пак, ја оцени италијанската мерка како неоправдана и дискриминаторска. Шпанските власти тврдат дека најголем дел од мигрантите кои пристигнале во Сеута веќе се вратиле во Мароко и дека нема индикации за мигрантски тек од Сеута кон Италија.
Рим, сепак, инсистира дека контролите не се насочени против Шпанија, туку претставуваат привремена безбедносна мерка.
Италијанската Влада порача дека доколку се утврди дека причините поради кои биле воведени контролите повеќе не постојат, подготвена е повторно да разговара со Мадрид.
Спорот меѓу двете земји отвора и пошироко прашање за функционирањето на Шенген-зоната и можноста земјите членки привремено да ги враќаат внатрешните гранични контроли во услови на мигрантски или безбедносни кризи.
…
