Основното јавно обвинителство – Скопје поведе скратена постапка против 46-годишен возач поради тешката сообраќајна несреќа што се случи во Радишани, во која животот го загуби мотоциклистот Никола Макрачевски.
Осомничениот се товари за тешки дела против безбедноста на луѓето и имотот во сообраќајот, согласно член 300 став 4 во врска со член 297 став 3 во врска со став 1, како и за неукажување помош на лице повредено во сообраќајна незгода по член 301 став 1 од Кривичниот законик.
Според информациите од Обвинителството, несреќата се случила на 7 август околу пладне, додека осомничениот управувал со автомобил „Сеат Алтеа“ по улицата „Радишанска“ во скопската населба Радишани.
Кога пристигнал на крстосницата со улицата „18“, каде што сообраќајот не е регулиран со сообраќајни знаци, возачот започнал да врти налево без да им даде првенство на возилата кои се движеле од спротивната насока.
На тој начин му го пресекол патот на мотоцикл „Кавасаки“, кој од спротивната страна продолжувал да се движи во својата насока.
Во обид да избегне директен судир со „Сеат Алтеа“, мотоциклистот свртел налево и преминал на коловозна лента наменета за сообраќај од спротивниот правец.
Таму, со предниот дел од мотоциклот удрил во автомобил „Алфа Ромео“, кој во тој момент се движел од спротивната насока.
Од силниот удар, мотоциклистот Никола Макрачевски излетал од моторот и паднал на коловозот, при што се здобил со тешки телесни повреди.
Од последиците на повредите тој подоцна починал.
Во сообраќајната несреќа со полесни телесни повреди се здобил и возачот на автомобилот „Алфа Ромео“.
Според Обвинителството, 46-годишниот осомничен, наместо да остане на местото и да укаже помош на повредените, го напуштил местото на сообраќајната несреќа.
За обезбедување на неговото присуство во понатамошниот тек на постапката, јавниот обвинител предложил повеќе мерки на претпазливост.
Предложени се забрана за напуштање на живеалиштето или престојувалиштето, обврска за редовно јавување во суд, привремено одземање на патната исправа, како и одземање на возачката дозвола.
