Приштина реагираше на изјавите на украинскиот претседател Володимир Зеленски за Косово, дадени за време на неговата посета на Белград, со порака дека очекува почитување на косовската државност и искуството на населението.
Зеленски во Србија истакна дека Украина го почитува територијалниот интегритет на Србија и дека ставот на Киев за Косово останува непроменет. Тој посочи дека Украина се придржува до принципите на меѓународното право, а воедно ѝ се заблагодари на Србија за поддршката на украинскиот територијален интегритет и суверенитет во рамките на Обединетите нации.
Од Приштина порачаа дека ја разбираат позицијата на земјите кои се соочуваат со војна и агресија, но очекуваат и нивните искуства и жртви да бидат почитувани.
Косовските власти нагласија дека поддршката за Украина останува, но дека односите меѓу државите не треба да се градат преку игнорирање или негирање на искуствата на косовското население.
Во меѓувреме, градоначалникот на Приштина, Пепарим Рама, објави дека од градот биле отстранети украинските знамиња и симболите поставени како знак на поддршка за Украина по почетокот на руската инвазија во 2022 година.
„Кога Косово не се почитува, главниот град Приштина секогаш одговара исто“, порача Рама.
Украина сè уште не ја признава независноста на Косово. Од друга страна, Приштина по почетокот на руската инвазија во повеќе наврати отворено застана во поддршка на Киев.
Најновата размена на пораки повторно го отвора чувствителното прашање за односот на Украина кон Косово, особено во контекст на нејзините односи со Србија и пошироката политика на Киев кон непризнатите и спорните територии.
