Две лица загинаа, а деветмина се повредени во големиот шумски пожар што беснее на грчкиот остров Саламис, западно од Атина. Огнот, поттикнат од силните ветрови, брзо се проширува низ островот, поради што властите наредија масовна евакуација на повеќе населени места.
Според информациите на грчката државна телевизија ЕРТ, телата на загинатите – маж и жена – биле пронајдени во областа каде што избувнал пожарот, уште пред на местото да пристигнат противпожарните екипи.
Девет лица се здобиле со изгореници и биле пренесени во локалниот здравствен центар. Според последните информации, нивната здравствена состојба е стабилна.
Поради исклучително брзото ширење на огнот, грчките власти го активираа националниот систем за итни известувања 112 и издадоа наредби за итна евакуација на повеќе населени места.
Пожарот во моментов се шири на два главни фронта – кон областите Перистерија и Селинија.
Пламените јазици зафатиле густа борова шума, а ситуацијата дополнително ја отежнуваат силните ветрови кои постојано го менуваат правецот и ја забрзуваат огнената стихија.
Во Перистерија веќе се регистрирани и опожарени куќи, што дополнително ја зголеми загриженоста дека пожарот може да предизвика уште поголема материјална штета.
Драматична евакуација и по морски пат
Особено тешка била ситуацијата за жителите и туристите кои останале заглавени на плажите во областите Сатерли и Колонес.
За нив била организирана операција за евакуација по морски пат.
Во акцијата се вклучени седум пловила на грчката крајбрежна стража и три фериботи, кои досега успеале да пренесат околу 90 лица на безбедно место.
Стотици пожарникари на терен
Во борбата со огнената стихија учествуваат 192 пожарникари, распоредени во повеќе единици, меѓу кои и 10 специјализирани тимови за справување со шумски пожари.
На терен се вклучени и голем број волонтери кои им помагаат на противпожарните екипи.
Од воздух пожарот го гаснат шест противпожарни авиони и осум хеликоптери, кои постојано дејствуваат врз најкритичните жаришта.
Сепак, силниот ветер значително ја отежнува работата на пожарникарите и создава опасност огнот повторно да се разгорува и да се проширува кон нови населени области.
Ситуацијата на Саламис и понатаму останува исклучително тешка и комплицирана, додека противпожарните сили се обидуваат да ги стават под контрола двата главни фронта и да спречат понатамошно ширење на пожарот кон населените места.
