Европската унија наесен би можела да воведе нов, досега најобемен пакет санкции против руски поединци и компании поврзани со војната во Украина.
Високата претставничка на ЕУ за надворешни работи и безбедносна политика, Каја Калас, најави дека со новиот пакет бројот на санкционирани руски физички и правни лица би се зголемил за една третина.
„На есен го презентирам најобемниот пакет санкции против руски поединци и субјекти од почетокот на војната“, изјавила Калас за германскиот весник „Ди Велт“.
Според неа, по усвојувањето на мерките, бројот на санкционирани руски поединци и субјекти веднаш ќе биде зголемен за околу една третина.
Од почетокот на целосната руска инвазија врз Украина во 2022 година, ЕУ досега усвои 21 пакет санкции против Москва. Последниот пакет беше усвоен по долги преговори меѓу земјите-членки, при што дел од државите се спротивставија на некои од предложените построги мерки.
Калас тврди дека досегашните санкции ја чинеле руската воена машинерија повеќе од еден трилион евра. Според податоците на Европската комисија, санкциите моментално опфаќаат околу 3.000 руски поединци и правни лица.
Новите мерки треба да бидат претставени наесен, по што земјите-членки ќе треба да дадат одобрение за нивно усвојување.
…
