Приклучувањето на Македонија кон Вертикалниот гасен коридор претставува значајна стратешка можност за земјата да ја зајакне својата позиција на европската енергетска карта и да стане важна алка во регионалната и европската гасна инфраструктура, порача Сања Божиновска.
Во објава посветена на идните енергетски поврзувања, Божиновска посочува дека клучна улога ќе имаат интерконекторите со Грција и Србија, преку кои Македонија ќе добие пристап до нови извори и нови правци за снабдување со природен гас.
Според неа, ваквото инфраструктурно поврзување ќе овозможи и пристап до течен природен гас – LNG, што треба дополнително да ја зголеми диверзификацијата на снабдувањето.
„Преку интерконекторите со Грција и Србија ќе обезбедиме пристап до нови извори и правци на снабдување со природен гас и течен природен гас LNG, поголема енергетска сигурност и намалување на зависноста од еден извор“, наведува Божиновска.
Една од главните придобивки, според објавата, е токму намалувањето на зависноста од единствен правец или извор на снабдување, што во иднина треба да придонесе за поголема стабилност и сигурност на македонскиот енергетски систем.
Но планираните интерконекции не се насочени само кон природниот гас.
Божиновска нагласува дека инфраструктурата е предвидена да овозможува транспорт и на 100 проценти водород, со што Македонија навремено би се подготвувала за развојот на идната европска водородна инфраструктура.
Тоа значи дека новите гасни поврзувања се планираат и со перспектива за енергетската транзиција и постепеното воведување нови, почисти енергенси во европскиот систем.
„Интерконекциите се планирани и за транспорт на 100% водород, со што Македонија се подготвува и за идната европска водородна инфраструктура“, истакнува Божиновска.
Според неа, вклучувањето во Вертикалниот гасен коридор и изградбата на интерконекциите треба да донесат три клучни придобивки за земјата – повеќе извори на снабдување, поголема енергетска сигурност и посилна регионална поврзаност.
„Повеќе извори, поголема сигурност и посилна регионална поврзаност“, порача Божиновска.
…
