Необични сцени сè почесто ги забележуваат туристите на Крит, каде изнемоштени мршојадци се појавуваат на најневообичаени места – од плажи и лежалки, до автомобили, автопати и аеродроми. Снимките брзо се шират на социјалните мрежи, а експертите предупредуваат дека ваквата појава е поврзана со сушата и долгите периоди на екстремно високи температури.
АНИМА е организација за заштита, згрижување, спасување, лекување и враќање во природата на диви животни со седиште во Атина и токму таму се испраќаат пронајдените и спасените мршојадци, доколку имаат потреба од грижа и нега.
Ганоти вели дека од крајот на јули згрижиле 30 мршојадци, додека пак само во текот на вчерашниот ден кај нив пристигнале пет, што според неа е значително голем број, а нагласува дека при пронаоѓањето, она што е најважно и потребно е да им се стави сад со вода.
Мршојадците на Крит се во многу добра состојба со стабилна популација, па затоа има доста млади. Проблемот е што младите мршојадци се неискусни. Многупати се неискусни и во летањето, ги зафаќаат воздушни струења, па завршуваат во морето, од каде што луѓето ги извлекуваат. Или, пак, не успеваат да ги најдат изворите на вода и храна што возрасните ги знаат, па дехидрираат и се исцрпуваат и затоа ги наоѓаат на пример на улици, неподвижни, а автомобилите застануваат и луѓето се прашуваат: „Што е ова?“. Она што им е потребно на овие млади мршојадци, пред сè, е да им се стави сад со вода. Тоа е најважно, објаснува претседателката на АНИМА.
Додава дека потоа, граѓаните треба да ја известат шумската служба од општината или Природонаучниот музеј, кои ги преземаат животните и ги пренесуваат во центрите за згрижување.
– Ние, повеќето од оние што ќе стигнат кај нас, ги ставаме на интензивна терапија со течности, односно веднаш им даваме инфузија, понекогаш неколку дена, додека не закрепнат. Потоа, по шест до осум месеци ги враќаме на Крит, додава Ганоти.
Социјалните мрежи во Грција во изминатите денови се преплавени со видеа и фотографии: „Мршојадец на лежалка на плажа“; „Возиш и мршојадец ти застанува на хаубата од автомобилот и се вози со тебе“; „Неочекуван гостин на плажа“.
Како што објави МИА во понеделникот, мршојадец „слетал“ на задното крило на авион паркиран на пистата на аеродромот во градот Ираклио, а беше спасен по интервенција на припадниците на противпожарната служба, за што пожарникарот Антонис Петракис на социјалните мрежи објави фотографии.
Последниот случај објавен на социјалните мрежи е од пред два дена, кога возачот Танасис Гунарис наишол на мршојадец на најпрометниот автопат на Крит во близина на градот Ретимно, застанал, заедно со други возачи за како што вели, да спасат еден живот.
– Едно прекрасно диво суштество, очигледно исцрпено, додека околу него автомобилите поминуваа со голема брзина. Веднаш застанав. Заедно со другите луѓе кои се најдоа на местото, накратко го прекинавме сообраќајот и со голема претпазливост, успеавме да го тргнеме од коловозот пред да се случи најлошото. Имав само малку вода и малку храна за мачки. Му ставив вода и му дадов малку храна, главно за да остане на безбедното место и повторно да не излезе на патот. И останавме таму со него, обидувајќи се да го заштитиме од автомобилите што поминуваа, напиша Гунарис на Фејсбук, објавувајќи видео од мршојадецот и додавајќи дека веднаш стапил во контакт со АНИМА и добил упатства по што од шумската служба од Ретимно го презеле животното.
…
