Машината за перење е уред кој го користиме речиси секојдневно, без премногу да размислуваме за тоа што се случува во неа. Ја ставаме облеката, ја избираме програмата и го притискаме копчето за старт. Но што се случува кога ќе снема струја, машината ќе се расипе, а вратата ќе остане заклучена?
Токму во таква ситуација може да биде исклучително корисен еден мал, скриен механизам кој го имаат голем број машини за перење. Станува збор за механизам за принудно отклучување на вратата, кој овозможува рачно ослободување на бравата кога електронското отклучување не функционира.
Каде се наоѓа скриениот механизам?
Вратата на машината може да остане заклучена поради различни причини – прекин на електричната енергија, дефект или затоа што во барабанот сè уште има вода.
Механизмот за принудно отклучување најчесто се наоѓа зад мало капаче на предната страна од машината, во близина на филтерот на пумпата. Сепак, неговиот изглед и точната позиција се разликуваат во зависност од производителот и моделот.
Кај некои машини изгледа како мала рачка или јазиче, додека кај други може да биде изведен како мало јаже или кабел.
Затоа, пред да се обидете да ја отворите машината рачно, најдобро е да го проверите упатството за употреба на конкретниот модел.
Различни производители – различни решенија
Кај машините за перење на Bosch и Siemens, механизмот најчесто се наоѓа во близина на филтерот на пумпата и може да изгледа како мала рачка која треба да се помести.
Кај одредени модели на Miele, во близина на филтерот може да има обоено јазиче, кое обично се повлекува надолу истовремено со отворање на вратата.
Кај Beko, механизмот исто така најчесто е зад долното капаче, а може да биде во форма на јазиче или кабел.
Кај некои модели на Indesit и AEG, механизмот може да се наоѓа во долниот дел од предната страна, зад капакот на филтерот. Во зависност од моделот, може да има рачка, јазиче или кабел.
Кај одредени модели на други производители, начинот на отклучување може да биде различен, па затоа упатството од производителот е најсигурен извор на информации.
Не ја отворајте вратата веднаш
Иако овој механизам може да биде многу корисен, не треба веднаш да се користи штом вратата ќе остане заклучена.
Прво проверете дали машината има струја, дали програмата е прекината и дали некоја облека ја попречува вратата.
Ако е потребно рачно отклучување, машината задолжително треба да се исклучи од електричната мрежа.
Особено важно е да се провери дали во барабанот има вода. Ако има, водата треба прво да се испушти за да се спречи истекување при отворањето на вратата.
Дури потоа може да се пристапи кон механизмот за принудно отклучување, следејќи ги упатствата за конкретниот модел.
Не обидувајте се да ја отворите вратата со сила
Присилното отклучување е безбедносна функција која може да биде од голема корист во случај на дефект или прекин на струјата. Сепак, неправилното користење може да предизвика оштетување на бравата или на самата врата.
Затоа, најважно е да не се употребува сила. Исклучувањето на машината од струја, испуштањето на водата и проверката на упатството се првите чекори.
Овој мал механизам можеби никогаш нема да ви биде потребен, но кога машината ќе се расипе, а вратата ќе остане заклучена, неговото постоење може да ви заштеди многу нерви и непотребно барање сервисер.
…
