Ново видео од големата спасувачка операција кај Северен Кипар покажува десетици преживеани патници на спасувачки брод, кој ги превезува кон брегот по превртувањето на траектот „Филоџет“.
Според последните официјални информации, од вкупно 267 лица на траектот досега се спасени 237. Потврдена е смртта на седум лица, додека спасувачките екипи продолжуваат да трагаат по уште 23 исчезнати.
Првичната информација објавена непосредно по несреќата зборуваше за една жртва, но трагичниот биланс во меѓувреме беше ревидиран.
На траектот се наоѓале 259 патници и осум членови на екипажот. Пловилото испловило од Киренија, позната и како Гирне, во 12:30 часот по локално време и се упатило кон турското пристаниште Ташуџу.
Само неколку минути по испловувањето траектот почнал да прима вода, а потоа се превртел на околу четири наутички милји од брегот. Точната причина за несреќата сè уште се утврдува.
Во спасувањето се вклучени повеќе бродови на крајбрежната стража, два хеликоптера, турски воени пловила, како и цивилни и патнички бродови. Спасените се пренесуваат во пристаништето во Киренија, каде што ги пречекуваат медицински екипи.
Дел од повредените се пренесени во болница, а властите соопштија дека сите расположливи сили остануваат ангажирани во потрагата по исчезнатите.
