По повеќевековна употреба на мапи што ја прикажуваат Африка значително помала од нејзината реална површина, Генералното собрание на Обединетите нации усвои резолуција со која се поттикнува користење на попрецизни картографски проекции.
Резолуцијата „Исправете ја мапата“ беше предложена од Того со поддршка на Африканската унија и доби широка меѓународна поддршка – 164 земји гласаа „за“, една беше против, а шест држави беа воздржани. Соединетите Американски Држави беа единствената земја што гласаше против, додека меѓу воздржаните се најдоа Украина, Грузија и Естонија.
Станува збор за иницијатива насочена кон постепено напуштање на познатата Меркаторова проекција, создадена во 1569 година од фламанскиот картограф Герардус Меркатор. Иако оваа проекција е исклучително корисна за морска навигација, таа значително ги искривува големините на континентите, особено оние блиску до екваторот.
Еден од најпознатите примери е споредбата меѓу Гренланд и Африка. На Меркаторовите карти тие изгледаат речиси еднакво големи, иако Африка во реалноста е околу 14 пати поголема.
Африканските земји тврдат дека ваквото прикажување со децении создава погрешна слика за вистинската големина, значење и потенцијал на континентот. Министерот за надворешни работи на Того, Роберт Дусеј, изјави дека „мапата никогаш не е неутрална“ и дека „праведен свет започнува со праведна мапа“.
Резолуцијата нема обврзувачки карактер и не ја забранува употребата на Меркаторовата проекција, но ги повикува владите, училиштата, меѓународните организации и технолошките компании да користат попрецизни карти, како што е проекцијата „Equal Earth“, која подобро ги прикажува реалните површини на континентите.
Одлуката на ОН отвора поширока дебата за тоа како картите влијаат врз перцепцијата на светот и дали начинот на кој се прикажуваат континентите има улога во обликувањето на глобалните односи и разбирања.
…
