Рускиот претседател Владимир Путин со декрет нареди руските операции на швајцарскиот прехранбен гигант „Нестле“ и францускиот малопродажен синџир „Ошан“ да бидат ставени под привремена управа.
Средствата на двете компании се префрлени под управување на руската фирма „Л.Е.В. Менаџмент“. Одлуката е донесена со претседателски декрет потпишан на 17 септември.
Портпаролот на Кремљ, Дмитриј Песков, изјави дека станува збор за европски компании од земји кои Москва ги смета за „непријателски“. Според него, при донесувањето на одлуката биле земени предвид и политичките околности поврзани со односите меѓу Русија и Западот.
„Нестле“ соопшти дека ја разгледува ситуацијата и своите можности, додавајќи дека ќе ги преземе потребните чекори за заштита на своите права и за продолжување на работењето во интерес на вработените и другите засегнати страни.
Швајцарската компанија во Русија има шест фабрики и околу 7.000 вработени. Во 2021 година, последната година за која објави податоци за рускиот пазар, продажбата во земјата изнесувала околу две милијарди швајцарски франци, односно околу два отсто од вкупната продажба на групацијата.
„Ошан“, пак, во Русија управува со околу 230 продавници и има околу 30.000 вработени. Компанијата засега не соопшти детали за одлуката, додека нејзината руска подружница продолжува да работи без промени.
Мерката е дел од пошироката руска политика кон имотот на компании од западни земји по почетокот на целосната инвазија врз Украина во 2022 година. Русија и претходно презеде контрола врз средствата на компании како францускиот „Данон“ и данскиот „Карлсберг“.
Според анализите на меѓународните медиуми, ставањето под привремена управа во Русија во повеќе случаи претходело на продажба или траен пренос на имотот на локални сопственици. Кремљ, сепак, засега ја опишува мерката како привремена.
…
