Рускиот претседател Владимир Путин станува сè посклон кон ризични потези додека војната во Украина продолжува, а истовремено се обидува да создаде поделби меѓу западните сојузници, предупреди заменикот на врховниот сојузнички командант на НАТО за Европа, сер Џон Стрингер.
Стрингер, кој е маршал на британските Кралски воздухопловни сили, говореше на безбедносна конференција во Талин, Естонија, во услови на зголемена загриженост во Европа поради руски активности поврзани со саботажа, шпионажа и инциденти со дронови и ракети.
Тој оцени дека земјите членки на НАТО мора внимателно да ги одмерат своите реакции на ваквите инциденти. Според него, Москва би можела да се обиде да ја испровоцира Алијансата на реакција која би била посилна од потребното.
„Напнатото опкружување“ бара внимателност, порача Стрингер, нагласувајќи дека границата меѓу намерен и ненамерен инцидент може да биде многу тенка, особено кога станува збор за дронови кои можат да навлезат во воздушниот простор на земјите членки поради електронско попречување.
Предупредувањата доаѓаат откако полскиот премиер Доналд Туск минатата недела изјави дека Русија би можела да изврши напади со дронови или ракети врз земји од НАТО, а потоа да ги претстави како несреќни или случајни инциденти.
Францускиот претседател Емануел Макрон, пак, побара од владата да подготви планови за заштита на критичната инфраструктура од можни напади со дронови и кибер-напади.
Сепак, проценките меѓу европските и НАТО функционерите не се целосно усогласени. Дел од нив предупредуваат дека руската закана е сериозна, но истовремено повикуваат на смиреност и избегнување непотребна ескалација. Латвискиот претседател Едгарс Ринкевичс изјави дека во моментот не се забележува руско воено засилување долж границите и оти директен конвенционален напад врз Европа не се смета за веројатен.
…
