Доскорешната директорка на албанската Државна разузнавачка служба (ШИШ), Влора Хисени, се најде под истрага на Специјалното обвинителство против корупцијата и организираниот криминал (СПАК), во случај што започнал со сомнителни државни ИТ-набавки, а подоцна се проширил и на доверливи документи.
Според албанските медиуми, Хисени е осомничена дека му помагала на еден од главните осомничени во случајот и дека откривала државна или службена тајна. Во пошироката истрага се опфатени 19 тендерски постапки со вкупна проценета вредност од околу 59 милиони евра.
Судот ѝ определил куќен притвор и суспензија од функцијата, додека Хисени се наоѓала на службено патување во Баку, Азербејџан. По враќањето, таа била запрена на границата меѓу Косово и Албанија и предадена на албанските власти.
Во меѓувреме, албанскиот премиер Еди Рама ја разрешил од функцијата директорка на ШИШ.
Во фокусот на истрагата е Националната агенција за информатичко општество на Албанија (АКШИ), преку која се реализираат голем број државни ИТ-набавки.
СПАК истражува сомневања дека организирана група влијаела врз тендерските постапки и ги насочувала кон однапред определени компании.
Меѓу клучните лица во истрагата е бизнисменот Ергис Агаси, за кого обвинителството се сомнева дека формирал структурирана криминална група поврзана со манипулирање на тендерите на АКШИ.
Хисени, според досегашните информации, не е осомничена дека лично ги местела тендерите. Нејзиниот случај се однесува на сомневања за помагање на сторител на кривично дело и откривање државна или службена тајна.
Дополнителен интерес предизвикуваат и информациите за пронајдени материјали означени како „државна тајна“, за кои албанските медиуми наведуваат дека потекнувале од ШИШ. Истрагата треба да утврди како таквите доверливи документи завршиле надвор од институцијата задолжена за нивно чување.
Во случајот се појавува и компанијата „ЕА Солушн“, основана од Агаси со капитал од 1.000 леки. Според албанските медиуми, компанијата уште во првата година пријавила приходи од 242,4 милиони леки и добивка пред оданочување од 232,1 милиони леки.
Особено внимание привлекува временската рамка. Компанијата била основана само 48 часа пред Рама јавно да објави дека ја предлага Хисени за директорка на ШИШ. Самото временско совпаѓање не претставува доказ за незаконска поврзаност, но Хисени и Агаси сега се опфатени со истата истрага.
Влора Хисени претходно работела во Косовската разузнавачка агенција, каде што од 2019 година била заменик-директорка. Во 2021 година била разрешена од функцијата од страна на тогашната косовска претседателка Вјоса Османи и премиерот Албин Курти.
…
