Италијанската влада усвои нова уредба со која се воведуваат промени во училиштата, меѓу кои и забрана за носење бурки и никаби, како и ограничување на бројот на ученици кои немаат италијанско државјанство или не го познаваат доволно италијанскиот јазик.
Премиерката Џорџа Мелони објасни дека мерките се насочени кон подобра интеграција и создавање услови за полесно вклучување на учениците во образовниот систем.
Забраната се однесува на облеката која целосно или делумно го покрива лицето. Таа ги опфаќа бурката, која го покрива телото и лицето, и никабот, кој остава откриени само очите. Хиџабот, кој ја покрива косата, но не и лицето, останува дозволен.
„Во училиште се оди со откриено лице“, порача Мелони, додавајќи дека никој не треба да биде принудуван да го крие лицето во име на традиција.
Покрај забраната за покривање на лицето, владата воведува и ограничување од најмногу 30 отсто ученици кои немаат италијанско државјанство или имаат недоволно познавање на италијанскиот јазик во одредени училишни паралелки.
Според владата, целта е да се избегне создавање паралелки со голема концентрација на ученици кои имаат јазични потешкотии и да се олесни нивната интеграција во образовниот систем.
Правилото ќе се применува различно во основното и средното образование. Во основните училишта ќе се однесува на странски државјани кои не се родени во Италија или не посетувале италијанска градинка најмалку две години. Во средните училишта ќе бидат опфатени ученици без италијанско државјанство кои немаат најмалку три години образование во италијанскиот систем.
Кога условите ќе дозволуваат, локалните училишни власти ќе треба да ги распределуваат учениците со слабо познавање на италијанскиот јазик меѓу повеќе училишта. Доколку тоа не е можно, ќе се применуваат исклучоци, но со дополнителна настава по италијански јазик.
Предвидена е поддршка и за родителите кои имаат потешкотии во комуникацијата со училиштата поради непознавање на јазикот. Тие ќе можат да посетуваат бесплатни курсеви по италијански до ниво А2, а уредбата предвидува и санкции во случаи на неоправдано непосетување по претходно предупредување.
Уредбата стапува во сила веднаш, но италијанскиот парламент треба да ја потврди во рок од 60 дена. Забраната за покривање на лицето треба да се применува од учебната 2026/2027 година, додека ограничувањето на бројот на ученици е предвидено да започне од учебната 2027/2028 година.
Опозицијата ги критикува мерките и ја обвинува владата дека со нив спроведува политичка агенда, додека власта инсистира дека целта е подобра интеграција и поголема еднаквост во образованието.
…
