Ученик од шесто одделение изгубил свест при опасна „игра“ со соученик во соблекувална на основно училиште во Белград, пренесуваат српските медиуми.
Според неофицијалните информации, инцидентот се случил претпладнето на 14 октомври, за време на час по физичко образование. Во него учествувале двајца 12-годишници од истото одделение.
Момчето изгубило свест откако соученик го фатил за вратот, а потоа му потекла крв од носот. Друг ученик побарал помош и го известил наставникот по физичко образование.
Наставникот веднаш реагирал, а за случајот биле известени директорот, училишниот полицаец и итните служби.
Екипа на Итната медицинска помош пристигнала во училиштето и го пренела момчето во детска болница, во придружба на неговата мајка. Според извештаите, тоа во меѓувреме се освестило, а во болницата биле предвидени дополнителни прегледи и проценка на здравствената состојба.
Медицинска помош му била укажана и на друг ученик, кој по инцидентот бил силно вознемирен. Во пренесените информации нема дополнителни детали за состојбата на хоспитализираното момче.
…
