Основaњето, поддржувањето и промовирањето комунистички, нацистички или други движења што докажано се насочени кон потиснување на човековите права и слободи во Чешка се казнува со затвор. Основната казна изнесува од една до пет години, а во потешките случаи законот предвидува од три до десет години затвор.
Измената на Кривичниот законик ја потпиша претседателот Петр Павел на 17 јули 2025 година, а се применува од 1 јануари 2026 година. Со неа комунистичките и нацистичките движења се експлицитно наведени во истата кривичноправна одредба.
Според членот 403, кривична одговорност постои за основање, поддршка или пропагирање такви движења кога тие докажано тежнеат кон укинување на правата и слободите или проповедаат расна, етничка, национална, верска или класна омраза, како и омраза кон друга група луѓе.
Повисоката казна, од три до десет години, е предвидена, меѓу другото, за извршување на делото преку медиуми или јавно достапна компјутерска мрежа, како член на организирана група, како војник или во услови на војна и загрозеност на државата.
Законот содржи и посебни одредби за ширење материјали со симболи, слогани и други обележја на опфатените движења. За таа одредба се предвидени исклучоци кога материјалите се користат за образование, истражување, уметност или известување за актуелни и историски настани.
Поддршка за измената даде чешкиот Институт за проучување на тоталитарните режими. Од институцијата оценуваат дека кривичното право треба еднакво да ги третира тоталитарните движења што ги потиснуваат основните права, со цел заштита на демократскиот поредок и почит кон жртвите.
Прашањето има силна историска тежина во земјата. Комунистичкото еднопартиско владеење во тогашна Чехословачка траеше од 1948 до 1989 година, кога Кадифената револуција го отвори патот кон демократски промени.
Истовремено, историското и академското проучување на комунизмот останува дозволено. Во интервју за Радио Прага, заменик-директорот на Институтот, Камил Недведицки, нагласи дека истражувачите и академската заедница слободно можат да разговараат за социјализмот и комунизмот.
