Италијанската премиерка Џорџа Мелони изрази солидарност со полицијата по судирите за време на протестите во Милано, обвинувајќи насилни групи дека ги користат демонстрациите за предизвикување нереди.
Во објава на социјалните мрежи, Мелони оцени дека припадниците на силите на редот повторно се соочиле со насилство од лица кои, според неа, дејствуваат и преку организирани групи.
„Членовите на силите на редот повторно се соочија со насилството на криминалците кои, дури и преку организирани групи, ги злоупотребуваат демонстрациите за да предизвикаат конфликти и да сеат хаос“, напиша Мелони.
Таа им упати благодарност на полициските службеници, нагласувајќи дека нивната задача е да ги заштитат граѓаните, работниците и сопствениците на продавници.
Според Мелони, сите имаат право да живеат во својот град без страв и без да сведочат на негово уништување од насилни групи, пренесе агенцијата Аднкронос.
Голема загриженост поради случувањата изрази и градоначалникот на Милано, Џузепе Сала.
…
