Земјотрес од 5,2 степени го стресе јужниот дел од Калифорнија

Утринава по локално време, јужно од Лос Анџелес беше регистриран земјотрес со интензитет од 5,2 степени според Рихтеровата скала, соопшти Националниот информативен центар за земјотреси (NEIC) при Американскиот геолошки завод (USGS).

Потресот се случи во 17:08 часот по координирано светско време (UTC), а епицентарот беше лоциран на 33,04° северна ширина и 116,57° западна должина, на длабочина од само 10 километри – што значи дека бил плиток и потенцијално почувствуван на поширока територија.

Сеизмичката активност е регистрирана во една од најпознатите тектонски зони во светот – границата меѓу Пацифичката и Северноамериканската плоча. Овие зони се познати по чести земјотреси, а дури и потреси со среден интензитет како овој, можат да предизвикаат вознемиреност кај локалното население.

Според првичните информации, потресот бил почувствуван во поголем дел од јужна Калифорнија, вклучувајќи ги Лос Анџелес, Сан Диего, Тихуана, па дури и делови од Аризона. Во оваа поширока област живеат над 30 милиони луѓе.

За среќа, досега нема извештаи за сериозна материјална штета или повредени. Но, граѓани на социјалните мрежи сведочат дека почувствувале краток, но интензивен потрес, кој на некои места предизвикал паѓање на предмети и разбудил сеќавања на претходни земјотреси.

Лавров: Русија и САД сè уште без договор за решавање на украинската криза

Русија и САД сè уште не постигнале согласност за клучните параметри на потенцијалниот договор за регулирање на ситуацијата во Украина, изјави рускиот министер за надворешни работи Сергеј Лавров во интервју за „Комерсант“.

– Клучните компоненти на договорот не се лесни за усогласување… Сè уште се разговара за нив, рече Лавров, додавајќи дека секој можен договор може да се постигне само доколку се елиминираат основните причини за конфликтот.

Тој истакна и дека во американската администрација се појавиле, како што рече, „разумни луѓе“ со кои може конструктивно да се разговара за прашања поврзани со работата на дипломатските мисии.

– Сега конечно има разумни луѓе во американската администрација, откако некои од кадрите на Бајден или си заминаа или беа отстранети. Со нив можеме да ги решаваме, барем, основните прашања за функционирање на дипломатските претставништва меѓу две земји кои официјално не прекинале дипломатски односи – истакна Лавров.

Американскиот претседател Доналд Трамп неодамна изјави дека рускиот лидер Владимир Путин е подготвен за договор за решавање на украинската криза, а и украинскиот претседател Володимир Зеленски е отворен за некаков вид компромис.

Путин, пак, на состанок со членовите на рускиот Совет за безбедност во јануари посочи дека целта не треба да биде привремен прекин на огнот за воено прегрупирање, туку долгорочен и одржлив мир.

– Русија ќе продолжи да се бори за интересите на својот народ. Тоа е суштината на специјалната воена операција. Мировен договор мора да се заснова на почитување на легитимните интереси на сите народи кои живеат во регионот – рече рускиот претседател.

Судот во Истанбул го одби барањето за пуштање на градоначалникот Имамоглу од притвор

Првостепениот кривичен суд во Истанбул денеска ја отфрли жалбата поднесена од адвокатите на градоначалникот на Истанбул, Екрем Имамоглу, со која се бараше негово пуштање од притвор додека трае судскиот процес за наводна корупција, јавува турската новинска агенција „Анадолу“.

Судот ја отфрли и жалбата за укинување на притворот за блискиот соработник на Имамоглу, Мурата Онгуна – претседател на медиумска компанија поврзана со Градот Истанбул – како и за другите осомничени во истиот случај.

Адвокатскиот тим на Имамоглу за медиумите изјави дека сè уште немаат добиено официјално известување за одлуката.

Екрем Имамоглу, еден од најистакнатите претставници на турската опозиција и потенцијален противкандидат на претседателот Реџеп Таип Ердоган на следните претседателски избори, беше уапсен на 19 март и четири дена подоцна официјално притворен под обвинение за корупција.

Тој ги негира обвинувањата, а неговата Републиканска народна партија (CHP) повеќепати истакна дека станува збор за политички мотивиран процес.

Приведувањето и последователното разрешување на Имамоглу од функцијата предизвикаа најголем бран антивладини протести во Турција во изминатава деценија. Турските власти, пак, тврдат дека правосудството работи независно и без политичко влијание.

Претседателските избори во Турција се закажани најдоцна до 7 мај 2028 година.