„Кумб Мела“ во Прајаграј – духовен настан кој ги надмина границите на Индија

Традиционалниот фестивал Кумб Мела и оваа година се одржа со несекојдневна масовност во индискиот град Прајаграј, во северната сојузна држава Утар Прадеш. Во периодот од 13 јануари до 26 февруари, устието на светите реки Ганг, Јамуна и Сарасвати го посетија неверојатни 660 милиони луѓе – верници, аџии и туристи – што оваа манифестација ја направи „најголемото собирање во историјата на човештвото“.

Светски фестивал на духовноста

Кумб Мела се организира на секои 12 години и претставува еден од најголемите духовни собири во светот, со учесници од сите делови на Индија и светот.

Централниот и најсветиот ритуал на фестивалот е капењето во реките, за кое се верува дека носи духовно прочистување и ослободување на душата од циклусот на прераѓање.

Покрај ритуалното капење, фестивалот вклучува духовни дискусии, молитви, културни програми, традиционални вашари и едукативни работилници, пренесува CNN.

Оваа година, фестивалот доби силен меѓународен карактер. Посетители пристигнаа од Австралија, Канада, САД, Бразил, Финска, Израел и многу други земји. Присуството на 118 дипломати од 77 земји дополнително го потврди глобалното значење на овој настан.

Организација од невиден обем

– Ова е искуство кое се доживува еднаш во животот. Ги видов речиси сите регистарски таблички од секоја индиска држава – изјави Сушован Сиркар од Њу Делхи, еден од посетителите на фестивалот.

Локалните власти посочија дека зад успешната реализација стои организациски подвиг од огромни размери. За безбедноста се грижеа 40.000 полицајци, додека за одржување на хигиената беа ангажирани околу 15.000 санитарни работници, објави BBC.

– Светот повторно ја виде моќта на традицијата што ги надминува времето, границите и нациите – порачаа организаторите, потенцирајќи дека Кумб Мела останува симбол на духовното единство и културното богатство на Индија.

Откриени можни траги на живот надвор од Сончевиот систем – планета оддалечена 124 светлосни години носи најсилен доказ досега

Планета оддалечена 124 светлосни години од Земјата би можела да биде клучот за одговорот на едно од најголемите прашања на човештвото – дали сме навистина сами во вселената? Според новите податоци добиени од вселенскиот телескоп „Џејмс Веб“, научниците откриле хемиски траги кои на Земјата се поврзуваат исклучиво со живи организми.

Станува збор за егзопланетата „K2-18 b“, која орбитира околу ѕвезда-црвенo џуџе во соѕвездието Лав. Таа е речиси девет пати помасивна од Земјата и се наоѓа во таканаречената „создавачка зона“ – регион околу ѕвезда каде што условите би можеле да дозволат постоење на течна вода.

Според објавените наоди во научното списание The Astrophysical Journal Letters, во атмосферата на оваа планета се идентификувани траги на диметил-сулфид (DMS) и диметил-дисулфид (DMDS) – молекули што на Земјата се создаваат исклучиво преку биолошки процеси.

– Ова е најсилниот доказ досега за можна биолошка активност надвор од нашиот Сончев систем. Сепак, остануваме крајно претпазливи – мора детално да ги провериме и автентичноста на сигналите и нивното значење – изјави проф. Нику Мадусудан од Универзитетот во Кембриџ.

Претходни набљудувања на „K2-18 b“ открија присуство на водена пареа, а понови анализи потврдија и метан во нејзината атмосфера – уште еден индикатор што потенцијално укажува на биолошки процеси.

Сепак, дел од научната заедница останува воздржана, предупредувајќи дека присуството на овие соединенија би можело да се објасни и со други – небиолошки – хемиски или геолошки процеси.

Иако резултатите имаат мала статистичка веројатност за грешка од само 0,3 проценти, тие сè уште не го исполнуваат стандардот за потврдени научни откритија во областа на физиката. Но, ако се потврди дека овие молекули потекнуваат од живот, тоа би бил навистина историски момент за науката и човештвото.

Емирот на Катар во официјална посета на Москва – средба со Путин за регионални и билатерални прашања

Емирот на Катар, Тамим бин Хамад Ал Тани, пристигна во официјална посета на Москва, каде што ќе оствари средба со рускиот претседател Владимир Путин, јавува катарската новинска агенција КНА.

Според најавите, двајцата лидери ќе разговараат за билатералните односи помеѓу Катар и Русија, со акцент на можностите за нивно продлабочување во различни области. Покрај тоа, на дневен ред ќе бидат и клучни регионални и меѓународни прашања од заеднички интерес.

Во катарската делегација се наоѓа и премиерот и министер за надворешни работи, шеик Мохамед бин Абдулрахман бин Јасим Ал Тани.

Средбата меѓу Путин и Ал Тани е закажана за четврток, а нејзиното одржување беше официјално потврдено од прес-службата на Кремљ уште еден ден претходно.