Силни емоции до солзи предизвика кај публиката вчерашната премиера на претставата „Црно семе“ на Народниот театар од Битола, работена по романот на писателот Ташко Георгиевски, а во режија на Андреј Цветановски. Ова беше прва театарска драматизација на славното дело на Георгиевски објавено во 1966, за кое семејството ги отстапи авторските права на Битолскиот театар, а драматизацијата е на Јелена Цветановска.

Пожртвуваната игра со целосно вложување на 17-те актери, како и темата за страдањата на Македонците од Егејскиот дел кои минале низ пекол само затоа што не сакале да се откажат од својот идентитет, ја трогна до солзи публиката. Актерите на сцената играа во вода, песок и прашина за што пореално да го остликаат ужасот низ кој минала група Македонци кои за време на Граѓанската војна во Грција (1946-1949) биле затворени на превоспитување на пуст остров во Грција. Таму од нив, преку бројни малтретирања, притисоци и безмилосни понижувања се барало да се откажат и со својата националност.

Ликот на ќосиот Доне од Саракиново одлично го одигра Марин Мирчевски кој со своите дијалози и монолози напати тивки, а на моменти гласни и гневни, успеа да ги отслика македонскиот непокор и истрајност. Брилјираше и Огнен Дрнаговски во улогата на високиот Христо, доловувајќи ја неговата тешка душевна состојба и маченичката смрт по преживените измачувања и понижувања.

Маестралната сценографијата на Сергеј Светозарев и моќните светлосни ефекти успеаја да го пренесат пустиот остров опкружен со вода на сцената и да ја претстават маченичката голгота на Македонците. На крај затворениците умираат пеејќи ја песната „Бело Море“ од Мизар.

Театарската екипа доби повеќеминутен бурен аплауз. По пауза од повеќе години, на битолската театарска сцена беше поставено едно од капителните дела на македонските романописци од 20. век, со голем интерес кај публиката.

-Премиерата на “Црно семе“ е утре, 16. април со почеток во 20 часот и е распродадена.

Денес на свената на Народниот театар Битола се одржа прес-конференција посветена на најновата премиера „Црно семе“, работена според романот на Ташко Георгиевски во режија на Андреј Цветановски.

-Станува збор за еден од култните романи на Ташко Георгиевски. Вчера 13.04 се навршија 13 години од неговата смрт, а оваа година исто така е јубилејна, се одбележуваат 90 години од неговото раѓање. Неговото семејство ни ги отстапи авторските права и беа среќни што некој се сетил да го постави на сцена неговиот текст од „Црно семе“. Претставата е посветена на нашите Македонци од Егејскиот дел на Македонија, на нивните страдања, упорност, издржливост, попустливост, на нивната борба за слобода, да зборуваат на својот мајчин јазик и борбата да го зачуваат својот национален идентитет“, истакна на почетокот директорот Васко Мавровски.

Ова е трета премиера на режисерот Андреј Цветановски во Битолскиот театар, кој на “пресот“ рече:

-Долго време барав место каде би можел да го поставам овој текст и среќен сум што е тоа овој театар, затоа што истиот за мене има големо значење и од семејна страна, мојот татко работеше тука често и се чувствувам како дома. За секој режисер најважно е да најде истомисленици, како што јас најдов тука. Судбината на помалите народи е тешка затоа што нивните приказни не се раскажуваат. Оваа претстава е да се издржи, да останеш свој и покрај сите притисоци.

Целиот текст на Bitolanews.mk

Викендов на 12 (сабота) и 13 (недела) април во Македонската филхармонија по 22. пат се одржа детскиот фестивал „Поточиња“. Најавените шест претстави беа исполнети до последното место со насмеани и распеани деца кои со многу еуфорија и емоција на првите тактови на популарната фестивалска химна ги пречекаа децата – учесници на големата сцена.

Маскотата – водител Поки (актерот Мартин Јорданоски) веднаш ја крена публиката на нозе и со првата песна “Дајте сите рачиња” се разлеа громогласен аплауз. Се редеа новите 17 песни од фестивалскиот репертоар, а вниманието на детската публика не изостана до самиот крај на фестивалот.

Последната песна “Стоп за војните” упати искрена детска порака за поубав свет. Поточиња 2025 имаше и хуманитарен карактер. Целиот приход од продадената дискографија на фестивалските денови, како и дел од средствата обезбедени од продажба на билетите ќе биде дониран за настраданите од несреќата во Кочани.

Новите песни изведени на Поточиња 2025 веќе се објавени на Youtube каналот Potocinja и истите може да се слушнат на следната плејлиста: