Каков е предлогот на трговците во врска со високите цени?
Наместо ограничена маржа на 10 отсто за над 1.000 продукти, да се состави листа од 100, 200 производи кои граѓаните секојдневно ги купуваат и нивните цени да се намалат.
Ова е предлогот на трговците и дистрибутерите до Владата кои сметаат дека ќе помогне да се ублажи скапотијата.
Нивните проценки се дека со владината одлука за ограничување се опфатени многу производи и дека некој треба да бидат изземени. Во понеделник треба да добијат одговор дали нивниот предлог се прифаќа или не.
Над 1.000 производи во секојдневната контрола е многу напорно и не може да се постигне бидејќи се случува, ги вадат картончињата затоа и имаме голем ризик фактор да дојде инспекција и да не биде обележана цената. Има многу труд и ресурси, а резулатот- не може да постигне да се спуштат што подолу цените, за да бидат подостапни за граѓаните, вели Даница Блажевска, претставник од Комората на трговци
На состанокот во Министерството за економија присуствувале и од Комисијата за заштита на конкуренцијата и од пазарна.
Реакцијата од трговците и дистрибутерите дојде откако Владата одлучи да ги ограничи маржите на дел од прехрамбените и непрехрамебените производи, по анализите од пазарна која покажа дека кај некои производи маржата достигнува и до 70 отсто. Со одлуката за ограничување освен оние 73 производи од есенската кошничка, влегуваат и гелови за туширање, хигиенските влошки, пелени, храна за бебиња, прашоци.
Оваа мерка не се воведува прв пат. И претходната влада ја практикуваше, но, често беше критикувана.
Трговците и дистрибутерите бараат и да бидат вклучени во креирањето на синдикалната кошничка, за која се бара нов начин на пресметка, затоа што според премиерот Мицкоски во нејзе има чудни производи.
