Политичките тензии во редовите на албанскиот политички блок во Северна Македонија достигнаа нов врв, откако Арбер Кадриу, член и коосновач на движењето ЛД, јавно обвини дека владејачката Демократска унија за интеграција (ДУИ) одмазнички го отпуштила неговиот татко од работа.
Според објавата на Кадриу, татко му бил единствениот редовен работник во ЈП „Хигиена Комунале“, спротивно на, како што вели, бројните партиски кадри на ДУИ кои земаат плата без да одат на работа. „Блерим Беџети и неговата клика, во знак на одмазда кон мене, го отпуштија мојот татко од работа“, напиша Кадриу, додавајќи дека „заканите на ДУИ нема да успеат да го исплашат“.
Според Кадриу, ова е само уште еден показател за нервозата во редовите на ДУИ, која, како што вели, сѐ повеќе ја губи поддршката од албанските граѓани. „ДУИ, ова име на капитулација, одмазда и предавство кон Албанците, ги има своите последни крици“, нагласи тој.
Оваа постапка се поврзува со зголемената политичка активност на Изет Меџити и неговата новоформирана партија, која, според аналитичарите, станува сериозен предизвик за ДУИ во претстојниот изборен процес. Политичките аналитичари предупредуваат дека нервозата во редовите на ДУИ би можела да предизвика уште пожестоки реакции и политички притисоци врз неистомислениците.
ДУИ засега не излезе со официјален став за наводите на Кадриу.
