Македонија

И владејачкото мнозинство бара надзорна расправа за аерозагадувањето

Оваа иницијатива, како што наведе пратеникот на ВМРО-ДПМНЕ, Бојан Стојаноски, е во 99 отсто идентична со онаа што ја поднесоа СДСМ и Левица, со една, како што ја нарече, клучна разлика, а тоа е што барањето на мнозинството е потпишано од 61 пратеник и во него е наведено дека претседателот на парламентот треба да одреди кое собраниско тело е надлежно за организирање ваква расправа

Претседателот на Постојаната анкетна комисија за слободите и правата на граѓанинот, Димитар Апасиев, претходно на прес-конференција обвини дека ВМРО-ДПМНЕ и ЗНАМ намерно ја саботираат надзорната расправа што тој веќе ја закажа за 25 февруари

По пратениците на опозициските СДСМ и Левица пред нешто повеќе од половина месец, денеска и нивните колеги од владејачкото мнозинство до претседателот на Собранието, Африм Гаши, доставија барање за одржување надзорна расправа за аерозагадувањето во Скопје и во другите градови.

Барањето на мнозинството, предводено од ВМРО-ДПМНЕ, е поднесено со потписи на 61 пратеник, а темата за која сакаат парламентот да расправа е насловена „Ефектите од аерозагадувањето во Скопје и во другите градови врз здравјето на луѓето и мерките што се преземаат за заштита на јавното здравје“.

Ова доаѓа откако вчера Комисијата за деловничко и мандатно имунитетни прашања донесе мислење, во кое се наведува дека претседателот на Собранието, Африм Гаши, треба да определи матична Комисија за расправата за аерозагадувањето и дека пратеникот и лидер на Левица, Димитар Апасиев требало првин да се консултира пред да ја закаже надзорна расправа во Постојаната анкетна комисија за слободите и правата на граѓанинот, со која претседава.

За барањето на мнозинството за надзорна расправа денеска на прес-конференција информираше пратеникот на ВМРО-ДПМНЕ, Бојан Стојаноски, кој рече дека ваква расправа ќе се случи со целосно почитување на одредбите од Деловникот.

„Веќе во процедура е поднесено барање за надзорна расправа до претседателот на Собранието, со кое ние бараме, врз основа на членот 21 од Законот на Собранието и член 214 став 5 од Деловникот, согласно надлежностите што ги има претседателот на Собранието, утврдени во членот 62 од Деловникот, да определи матично работно тело кое што ќе одржи надзорна расправа на тема – ‘Ефектите од аерозагадувањето во Скопје и во другите градови, врз здравјето на луѓето и мерките што се преземаат за заштита на јавното здравје’“, рече Стојаноски.

Ова барање, како што наведе тој, е во 99 отсто идентично со она што го поднесоа СДСМ и Левица, со една, како што ја нарече, клучна разлика, а тоа е што барањето на мнозинството е потпишано од 61 пратеник.

„Бараме од претседателот на Собранието согласно одредбите во Деловникот да утврди матично работно тело на кое што оваа надзорна расправа ќе се одржи“, рече Стојаноски.

Мнозинството, како што додаде тој, смета дека надзорната расправа, врз основа на одредбите од Деловникот, треба да заврши со утврдување одговорност на сите оние коишто изминатите години не направиле ништо во борбата против аерозагадувањето.

„Ние нема да учествуваме во политички организирани расправи кои треба да фрлат гума за спасување некому и да му ја спасуваат политичката кариера“,кажа пратеникот на ВМРО-ДПМНЕ.

Стојаноски вели дека клучната разлика во постапката за организирање на надзорната расправа е што не се почитувал членот 62 став 5 од Деловникот односно дека претседателот на Собранието одредува кое матично работно тело ќе ја организира надзорната расправа. Пратениците, според него, немаат право сами да одредуваат на кое матично тело ќе се одржи расправата.

„Тоа нивно барање нема таква одредба, а ние во нашето барање на првата страница исклучиво бараме од претседателот на Собранието, согласно неговата надлежност, да одреди кое е надлежно тело за организирање на оваа расправа. Ако претседателот одлучи тоа да биде Анкетната комисија, ние немаме проблем со тоа“, рече Стојаноски, кој додаде дека претседателот на Собранието е суверен во толкување на Деловникот и во почитување на правилата.

Проблемот за нив, како што кажа, е политизирање на темата за аерозагадувањето.

„Ако ја видите листата на гости, мене ми е индикативно тоа што нема ниту еден функционер кој извршувал таква функција која е одговорна за спречување на аерозагадувањето претходните седум години“, рече пратеникот Стојаноски.

Претседателот на Постојаната анкетна комисија за слободите и правата на граѓанинот, Димитар Апасиев, претходно на прес-конференција обвини дека ВМРО-ДПМНЕ и ЗНАМ намерно ја саботираат надзорната расправа што тој веќе ја закажа за 25 февруари.

Лидерот на Левица и претседател на Анкетната комисија, Апасиев упати и апел до собранискиот спикер Гаши да не го послуша мислењето на Комисијата за деловнички и мандатно-имунитетни прашања, со кое се бара тој да определи матична комисија за расправата за аерозагадувањето, наместо расправата да биде на Анкетната комисија. Во спротивно, како што рече Апасиев на прес-конференцијата, Гаши ќе се соочи со правни последици.

Опозициските СДСМ и Левица нивната иницијатива за одржување надзорна расправа за аерозагадувањето ја поднесоа на 30 јануари.

„Да разговараме какви мерки и активности се преземени од страна на владата и на другите надлежни институции. Заради тоа што ова е една од основните функции на Собранието, да преку вакви деловнички и законски инструменти, успееме да седнеме сите на една маса и пред граѓаните да ги отвориме сите прашања“, рече координаторот на пратеничката група на СДСМ, Оливер Спасовски, на 30 јануари.

Тој тогаш кажа дека секој еден што мисли дека е одговорен политичар треба да застане зад оваа иницијатива.

Македонија

Туфегџиќ: Ревизија на предметите во ОЈО клучна за враќање доверба во правосудството

Вечерва во емисијата „Клик Плус“ на ТВ21, адвокатот Владимир Туфегџиќ истакна дека новоизбраниот јавен обвинител треба итно да спроведе ревизија на проблематични предмети во Јавното обвинителство.

„Новиот јавен обвинител веднаш да спроведе контрола на законите во неколку предмети на сите обвинители по случаен избор. Ќе испливаат на површина обвинители кои имаат хроничен проблем со обвиниение, со начинот на постапување, со менаџирање на постапка, со прибирање на докази. Јавното обвинителство ќе добие реална слика кој како постапува, и ќе видите дека шест месеци колку трае истрага, во голем дел не е преземено ниту едно дејствие“, рече Туфегџиќ.

Адвокатот нагласи дека ревизијата е клучна за враќање на довербата на јавноста во работењето на обвинителството.

Македонија

МВР со конечна одлука еве кога почнува „Безбеден град“

Министерството за внатрешни работи официјално потврди дека автоматизираниот систем за сообраќајно санкционирање „Безбеден град“ ќе почне со работа на 1 февруари 2026 година, еден месец подоцна од првично најавениот датум.

Одложувањето доаѓа во период кога јавноста сè уште е фокусирана на состојбата во Скопје, а тестирањата на системот продолжуваат и во Тетово и Куманово – градови во кои истовремено со главниот град треба да почне издавањето автоматски казни.

Теренското тестирање покажа дека дел од камерите не регистрираат прекршоци, особено при мали надминувања на брзината. Советничката во кабинетот на министерот за внатрешни работи, Снежана Петровиќ-Арсовска, потврди дека се разгледува воведување праг на толеранција, но конечната одлука сè уште не е донесена.

Повеќе локации во Скопје, Тетово и Куманово, како и на коридорите 8 и 10, веќе се покриени со камери, но дел од нив не функционираат целосно или не се калибрирани. Најголемиот број регистрирани прекршоци досега доаѓаат од скопската обиколница, каде системот издаде опомена за само едно надминување на брзината за време на тестирањата.

Во Тетово и Куманово ситуацијата е поизразена – на многу локации камерите воопшто не биле активни или не регистрирале прекршок, иако намерно биле направени неколку. Дополнителен проблем е постојаното непрописно паркирање, за што МВР најавува дека ќе се користат специјализирани патролни возила со опрема за снимање кои ќе кружат низ градовите.

Во Куманово, само неколку дена по тестирањето, се забележани нови точки на кои се поставуваат свежи камери – што укажува дека системот сè уште се надградува.

Од МВР велат дека „Безбеден град“ ќе биде пуштен во целосна функција од 1 февруари, а до тогаш продолжува тест-фазата и калибрацијата. Дополнителниот месец, според надлежните, треба да го обезбеди потребното време за проверка на техничките параметри, но и да им даде можност на возачите да ги коригираат своите навики пред почетокот на автоматизираното казнување.

Извор: 360степени

Македонија

Андоновски: Родителите да имаат увид во изборот на деца за мобилни апликации – кон корисни и образовни содржини

И покрај австралискиот преседан со законска забрана на социјалните мрежи за деца под 16 години, Македонија засега цврсто стои настрана од радикални забрани. Министерот за дигитална трансформација, Стефан Андоновски, потврди дека прашањето се разгледува, но изрази сериозни сомнежи во врска со примената и подготвеноста на општеството за ваков драстичен чекор.

„Секоја забрана треба да бидете свесни како ќе ја донесете, ќе има два ефекти. Ако не успеете да ја имплементирате до крај, таа ќе придонесе некои да се снаоѓаат, а некои да излезат целосно од контрола.“ – истакна Андоновски, потенцирајќи го ризикот од неефикасност и заобиколување на мерките.

Наместо да се посегне по забрани, министерот го гледа решението во едукацијата и интензивната работа со родителите. Според него, одговорноста е на семејствата да го насочат времето што децата го минуваат на мобилните телефони кон корисни содржини, а не кон бесцелни „натпревари“ и „губење време“.

Прашан за личниот став во врска со австралискиот закон, Андоновски беше директен и скептичен:

„Моето очекување е дека нема да успее проектот целосно, затоа што првите најави веќе покажуваат дека се наоѓаат начини преку технички уреди и врски да се заобиколат забраните.“

Министерот потсети дека во земјава веќе се работи на заштита на децата преку Центарот за побезбеден интернет. Тој децидно појасни дека секој социјален медиум веќе има возрасна граница под 16 години.

Ако родителите го имплементираат тоа кај своите деца, тогаш децата нема да имаат пристап до алгоритми и содржини кои се штетни за нив. Ако тоа не го прават родителите, многу е потешко државата да се меша во слободниот избор на секој граѓанин и семејство и да одлучува што смеат, а што не смеат.

Со ова, Владата ја префрла топката назад кај родителската контрола, сугерирајќи дека државната интервенција во приватниот семеен избор е последна и најтешка опција.