Република

Јаулески: „Да си подадеме рака и да правиме добри дела“

Пратеникот Јован Јаулески повторно покажа дека хуманоста нема граници. Како и изминатите години, денес тој го посети селото Ложани и донираше повеќе од 40 пакети со прехранбени производи за оние на кои им се најпотребни.

Во пресрет на празникот Св. Власиј, кој воедно е и селска слава, Јаулески истакна дека секој, во рамки на своите можности, може да направи нешто добро за другите. Неговата донација, како што вели, можеби е мал гест, но за некого ќе значи многу, особено во време кога македонскиот народ се соочува со економски предизвици.

„Не сме сите создадени да правиме големи работи, но затоа можеме да правиме мали работи со многу љубов. Најважно е да си подадеме рака и да не заборавиме да бидеме луѓе. Нема поголема награда од тоа да си причина за нечија среќа,“ порача Јаулески.

Со овој хуман гест, тој уште еднаш покажа дека политиката не треба да се мери само со зборови, туку со конкретни дела што прават разлика во животите на граѓаните.

Република

БИТОЛА БЛЕСНА ВО НОВА НОВОГОДИШНА СВЕТЛИНА

Битола и кажа добредојде на новогодишната магија. Претпразнично блеснаа улиците, плоштадите, сцените каде и годинава ќе се случува „Зимската приказна“.
Нова светлина, нова енергија, нова радост за граѓаните на Битола и сите гости.

Со оваа фотогалерија Ви пренесуваме дел од новогодишната магија во градот под Пелистер, подготвен за уште едно ново издание на предновогодишната програма на препознатливата „Зимска приказна“.

Република

Плакат од Киро Урдин во рацете на Коњановски како симбол на поддршката за „Браќа Манаки“

Директорот на Интернационалниот фестивал на филмската камера „Браќа Манаки“, Димитрија Доксевски, и извршниот директор Роберт Јазаџиски остварија средба со градоначалникот на Битола, Тони Коњановски, на која беше потврдена силната соработка меѓу фестивалот и Општина Битола.

На средбата се разговараше за долгогодишната партнерска врска која градот домаќин ја има со најстариот фестивал за филмска камера во светот, како и за подготовките за 47-то издание, чија цел е уште повпечатлива организација и достоинствен прием на меѓународните гости.

Како израз на благодарност, Доксевски и Јазаџиски на градоначалникот му врачија плакета со мотив од официјалниот плакат на 46-тото фестивалско издание, чиј автор е светски признатиот македонски сликар Киро Урдин.

Република

Проданоски оствари средба со британскиот амбасадор Лосон во Прилеп

Градоначалникот на Општина Прилеп, Дејан Проданоски, денеска оствари значајна протоколарна средба со амбасадорот на Обединетото Кралство во Македонија, Н.Е. Метју Лосон. На состанокот присуствуваа и претседателката на Советот на Општина Прилеп, како и пратениците од Прилеп во Собранието на Република Македонија.

Проданоски пред амбасадорот ја претстави моменталната состојба во општината, локалните потенцијали, унапредената бизнис клима, тековните и идните инфраструктурни инвестиции, како и поволностите што ги нуди Општина Прилеп за идните инвеститори. Тој нагласи дека Прилеп отсекогаш се гордее со својата традиција, вредности и квалитетот што може да го понуди на Европа.

Амбасадорот Лосон ја презентираше работата на Британската бизнис асоцијација, истакнувајќи ја јасната определба за зајакнување на деловните врски и подобра поврзаност меѓу компаниите – можност што отвора пат за нови инвестиции во регионот.

На средбата беше отворена и темата за Договорот за стратешко партнерство меѓу двете влади, чија реализација вклучува капитални проекти од огромно значење, меѓу кои и изградбата на хидроелектраните Чебрен и Галиште. Овие инвестиции се очекува да донесат силен развоен импулс за Прилеп и поширокиот регион.

Проданоски порача дека општината продолжува да ги продлабочува билатералните односи и да работи на подобрување на условите за живот, развој и економски напредок на сите граѓани.