Цените на становите во Охрид бележат рекорден раст, достигнувајќи и до 4.000 евра за квадратен метар на најатрактивните локации, како крајбрежјето и центарот на градот. Во останатите делови, како Охридати, Билјанини Извори и Воска, тие се движат меѓу 1.200 и 1.500 евра, додека постарите станови, во зависност од состојбата и локацијата, може да се најдат за околу 1.000 евра по квадрат.
Побарувачката значително ја надминува понудата, што доведе до дуплирање на цените во однос на 2020 година. На овој тренд влијаат и зголемените трошоци за градежни материјали, инфлацијата, како и ограничената понуда на нови станови.
Најголем интерес има за помали станови, со површина од 30 до 50 м², кои се купуваат не само за живеење, туку и како инвестиција за туристичко изнајмување. Овие недвижности најбрзо се продаваат, особено ако се во близина на езерото или во популарни зони како Свети Стефан и Пештани.
Главни купувачи се жители од Скопје, иселеници, како и странци, меѓу кои најмногу има Холанѓани, Германци и Скандинавци. Се зголемува и интересот за куќи во стариот дел на Охрид, каде цените достигнуваат до 3.000 евра по квадрат, зависно од локацијата и погледот.
Дополнително, изградбата на луксузни комплекси на премиум локации дополнително ја зголемува побарувачката и ги зголемува цените на недвижностите во градот.
