Македонија

Сиљановска – Давкова: Време е за крај на војната во Украина

Претседателката на Република Македонија, Гордана Сиљановска – Давкова, присуствуваше на настанот „Три години одбрана од целосната руска агресија“, организиран од Амбасадата на Украина и Мисијата на Европската Унија.

На настанот се обратија украинската амбасадорка, амбасадорот на ЕУ, високи владини функционери, амбасадори, верски претставници, професори, новинари и активисти. Тие упатија апел за почитување на меѓународното право и повикување на принципите на суверенитет и територијален интегритет загарантирани со Повелбата на ООН.

Во рамки на настанот беше прикажан потресниот украински краткометражен филм „Rock, Paper, Scissors“, како и изложбата „Борбата на Украина за слобода“, чијашто порака за воената пустош и човечките страдања потсетува на „Герника“ на Пикасо.

„Поминаа три години во кои милиони луѓе се најдоа очи в очи со смртта. Три години уништување, непроценливи загуби, реки бегалци и моменти кога изгледаше дека светот е на работ на нуклеарна војна. Време е за соочување со реалноста и за крај на оваа ужасна војна,“ истакна Сиљановска – Давкова.

Таа изрази надеж дека следната година, во истиот простор, ќе се прослави една година мир во Украина, но и загриженост дека многу мировни ветувања низ историјата биле заборавени. Претседателката потсети дека ООН, која доби Нобелова награда за мир, дозволи војна, а Европската заедница, која требаше да гарантира вечен мир, денес сведочи на војна на европско тло.

Нејзината порака беше јасна: време е за правда, мир и крај на страдањата.

Македонија

Божиновска присуствуваше на шведската прослава на светлината

Вечерва Сања Божиновска присуствуваше на традиционалниот концерт во чест на Санта Луција, кој го организираше Шведската амбасада. Празникот е симбол на светлина, топлина и надеж во најтемните нордиски ноќи.

„Секогаш е убаво кога една традиција носи порака која допира подалеку од границите – дека светлината ја создаваме самите, и дека најмногу ни е потребна токму во студените, тивки моменти од годината“, изјави Божиновска.

Таа изрази благодарност до амбасадата за прекрасната атмосфера и можноста да ја почувствува оваа уникатна шведска традиција, која најавува доаѓањето на Божиќ со радост, музика и светлина.

Македонија

Сообраќајот на Евзони повторно во прекин од 17 часот

АМСМ информира дека од 17 часот повторно е блокиран сообраќајот на Граничниот премин Евзони (ГП Богородица).

Според последните информации, сообраќајот на државните патишта се одвива непречено, по суви коловози и со умерен интензитет надвор од градските средини. На македонските гранични премини нема подолги задржувања за влез или излез од државата.

АМСМ апелира до возачите да возат со прилагодена брзина, да ја почитуваат поставената сигнализација и да бидат особено внимателни на патиштата низ котлинските и клисурните делови, каде што постои ризик од одрони. Најкритични се делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

Студентите имаат уште десет дена за апликација за ваучери

Министерството за дигитална трансформација потсетува дека студентите имаат рок до 20 декември 2025 година да аплицираат за ваучери за електронски уреди.

Досега се доделени 42.606 ваучери, од кои 27.426 веќе се искористени. Во рамките на владината програма, предвидени се вкупно 55.000 ваучери за студенти на додипломски студии запишани во учебната 2025/26 година.

Ваучерите можат да се искористат најдоцна до 31 декември 2025 година.