Министерот за надворешни работи и надворешна трговија, Тимчо Муцунски, престојуваше во Будимпешта во рамки на Втората меѓувладина седница меѓу Северна Македонија и Унгарија. При посетата, Муцунски оствари билатерална средба со министерот за надворешни работи и трговија на Унгарија, Петер Сијарто, на која беа разгледани прашања од заеднички интерес, со фокус на билатералната и мултилатералната соработка.
Главни теми на разговорите беа тридецениското пријателство меѓу двете земји, динамиката на трговската соработка и перспективите на Северна Македонија во процесот на европската интеграција. Унгарија уште еднаш ја потврди својата недвосмислена поддршка за македонските евроинтеграциски напори, нагласувајќи ја важноста на реформите и стабилноста во регионот.
По средбата, министрите потпишаа акциски план кој ќе овозможи размена на знаења и експертиза во домените на ЕУ-интеграциите и економската дипломатија. Во своето обраќање пред медиумите, Муцунски ја истакна значајната соработка меѓу Северна Македонија и Унгарија, нивното сојузништво во НАТО и заедничките позиции во однос на актуелните геостратешки предизвици.
Посетата на Будимпешта претставува важен чекор во продлабочувањето на односите со Унгарија, партнерска земја која останува силен поддржувач на македонските аспирации за членство во Европската Унија.
