Република

ИНТЕРВЈУ на Brif со градоначалникот Коњановски: 2024 година рекордна по бројот на проекти во општина Битола, во 2025 ќе се работи со уште поголемо темпо

Општина Битола ќе аплицира со голем број, односно со околу 30-тина проекти на вториот Јавен повик за државна финансиска помош на општините со средствата од унгарскиот кредит. На првиот повик, општината аплицираше и ги доби сите 16 проекти од Владата. Паралелно, општината работи на голем број капитални проекти од свои средства и од проекти, вложува во инфраструктурата, културата, спортот…сите овие активности се повод за разговор со градоначалникот на општина Битола, Тони Коњановски.

Бриф: Господине Коњановски, годинава општина Битола има буџет од околу 44 милиони евра. Од оперативниот дел на буџетот, над 55% се однесува на капитални инвестиции. Кои се тие капитални инвестиции и кои придобивки ќе ги имаат жителите на општината?

Коњаноски: Годинава општина Битола има историски најголем буџет од околу 44 милиони евра. Еден од можеби најзначајните објекти кои што во изминатиот период се залагавме да се реализира, полека веќе ги добива првите видливи резултати. Знаете, на Балканот, првата противпожарна станица и екипа е формирана токму во Битола, а нашите пожарникари кои што територијално ги покриваат и општините Новаци и Могила, работат во несоодветни услови. Конечно, пожарникарите ќе добијат нова противпожарна зграда, каква што им доликува. Карабинскиот дел од објектот е завршен, веќе влегуваме во втората фаза на доизградба на објектот.

Влезот од страната на Прилеп со години е лоша слика за влез во една урбана средина како што е градот Битола и ова е уште еден од нашите капитални проекти. Реконструираниот влез на ул. „8 Септември“ опфаќа промена на канализациона и водоводна мрежа која што е во тек, проширување на коловозната површина и ново осветлување, како што и доликува на Битола.

Работиме и на изработка на нов Генерален Урбанистички план, бидејќи повеќе од 20 години не е обновен, а современиот начин на живот бара и нови идејни решенија, кои преку различни студии ќе бидат дел од ГУП-от и ќе донесат подобри решенија во сообраќајот, инфраструктурата и целосната слика на градот.

Бриф: Општина Битола доби средства за 16 пректи од првиот повик на Владата, од средствата од Унгарскиот кредит и е општина со најголем број прифатени проекти. Дали и овие проекти беа дел од развојната програма и што опфаќаат?

– Да, добивме поддршка за реализација на 16 проекти, од кои 13 се од областа на инфраструктурата, 2 од областа на спортот и еден од областа на енергетската ефикасност. Опфатени се реконструкции на повеќе улици и патишта:

Реконструкција на коловоз на локален пат за с.Буково

Реконструкција на коловоз на локален пат за с. Магарево

Реконструкција на коловоз на ул.Панде Кајзеро

Реконструкција на коловоз на Булевар 1-ви Мај

Реконструкција на ул.11-ти Март и Панде Николов, Козара и Чеде Филиповски

Реконструкција на водоводна линија на потегот с.Поешево – с.Логовоарди

Реконструкција на канализација на ул.Панде Кајзеро

Во инфраструктурните проекти имаме и изградби, особено во населбата АРМ, но и во други делови на градот и тоа:

– Изградба на коловоз на улици 150-та , 170-та и 210-та,

-Изградба на инфраструктура на улица СТУ 3 АРМ четврт 1,

-Изградба на фекална канализациона и атмосферска мрежа за ул.од ДУП за БРЛ 4 дел и ДУП БЛР 4 дел блок 2 ( ул. 150; 170 и 210)

-Изградба на канализација на ул.СТУ 3 АРМ четврт 1( фекална и атмосферска со приклучоци)

– Изградба на улично осветлување на ул. СТУ 3 АРМ четврт 1

-Улично осветлување на ул.11-ти Март и Панде Николов

Тука се и двата спортски објекти, Изградба на центар за спорт и рекреативни активности (боксерски клуб), како и санација на јужна трибина на фудбалскиот стадион ,,Петар Милошевски”.

Последниот проект во листата на 16-те проекти се однесува на енергетската ефикасност, односно изведба на нова енергетска и ефикасна фасада на ООУ ,,Стив Наумов “, со што во ова училиште се заокружува целината на едно од најенергетси ефикасните во градот. За најголем дел од проектите, веќе се спроведени јавни набавки, а дел од нив се и завршени, со што наскоро ќе почне и теренската реализација.

Целото интервју може да го прочитате на Brif.mk

Република

Коњановски ги прими просветните работници на годината од Битола

Градоначалникот на Битола, Тони Коњановски, денеска оствари средба со добитничките на признанието „Просветен работник на годината“ за учебната 2024/2025 година – Наташа Тодоровска, наставник по одделенска настава во ОУ „Ѓорѓи Сугарев“, и Аница Б. Златевска, психолог во ОУ „Коле Канински“.

Коњановски им честиташе за значајното признание доделено од Министерството за образование и наука и Сојузот на просветни работници, нагласувајќи дека ваквите награди се симбол на поширока општествена заложба за почит и вреднување на улогата на наставниците, воспитувачите и стручните соработници во образованието.

Тој истакна дека трудот на просветните работници е фундаментален за формирањето на идните генерации и дека локалната самоуправа ќе продолжи да ја поддржува нивната работа.

Признанијата се доделуваат во рамките на кампањата „Магијата е во знаењето“, која Министерството ја реализира по повод 5 Октомври – Светскиот ден на учителите, со цел истакнување на незаменливата улога на учителите и зголемување на општествената почит кон нив.

Република

Мал авион се сруши во Мавровско Езеро, едно лице повредено

Мал авион утрово се урна во Мавровско Езеро, при што две лица се наоѓале во леталото, а едното од нив е повредено. Инцидентот бил пријавен на бројот 112, по што информацијата веднаш била проследена до надлежните служби.

Директорот на Центарот за управување со кризи, Мухамед Али, изјави дека ЦУК ја информирал СВР Тетово, Итната медицинска помош и Регионалниот центар за управување со кризи – Тетово за потребната итна интервенција.

Екипите веднаш излегле на терен и работат на извлекување и обезбедување на лицата од авионот, како и на утврдување на причините за падот.

Извор: тв21

Република

Проданоски ги повика прилепчани на заедничко одбележување на Свети Никола

Градоначалникот на Прилеп, Дејан Проданоски, упати покана до граѓаните да присуствуваат на централното одбележување на Градската слава и патрониот празник на градот – Свети Никола. Оваа година се одбележуваат 20 години од прогласувањето на Свети Никола за заштитник на Прилеп, значаен јубилеј кој, како што истакна Проданоски, го зацврстува чувството на заедништво и традиција.

Свеченото одбележување ќе започне во 08:00 часот со литургија во храмот „Св. Благовештение“. Во 12:00 часот пред параклисот „Св. Никола“ ќе се одржат водоосветување и прережување на славскиот колач, по што граѓаните заедно ќе се упатат кон плоштадот „Александрија“. На плоштадот ќе биде поставена традиционалната светиниколска посна трпеза, а празничната атмосфера ќе ја збогати настапот на групата „Тајфата“ на Камената бина.

Проданоски ги повика сите прилепчани, како и граѓаните од цела Македонија, да се приклучат на прославата и да го одбележат празникот со заедничка радост и достоинство.