Црна Хроника

Малолетник пукал и усмртил куче во с. Муртино

Здружението за заштита на животните „Анимал Лаверс“ – Струмица објави дека малолетник усмртил куче во струмичкото село Муртино. Полицијата потврдила дека сторител на овој грозоморен чин е малолетно лице, а случајот веќе е предаден на Јавното обвинителство. Немилиот настан се случил на 27 февруари.

Здружението постави низа прашања до институциите:

-Како е можно малолетник да знае да стрела директно во срцето? Дали во ова семејство децата се учат да ракуваат со оружје? Дали општеството ќе остане слепо пред воспитување кое поттикнува насилство? Зарем не беше доволна трагедијата во соседна Србија, па сега сакаме да сведочиме на слични случаи и кај нас? ОВА НЕ СМЕЕ ДА ПОМИНЕ БЕЗ КАЗНА! Државата не смее да дозволи оружјето да се наоѓа во рацете на секого, без евиденција и контрола. Научните истражувања покажуваат: Децата кои вршат насилство врз животни или послаби соученици од најрана возраст, подоцна можат да станат насилници или сериски убијци. Што можеме да очекуваме од идните генерации ако овие злосторства останат без последици, прашаа од „Анимал лаверс- Струмица“.

Ги повикуваат сите граѓани да ја подигнат свеста и да бараат правда за Рекс, бидејќи ова не било само прашање на заштита на животните, туку и на безбедноста на целото општество. Инаку, како што веќе беше порано објавено од полицијата во кучето било пукано со воздушна пушка.

Lokalno.mk

Црна Хроника

Скопјанец измамен за 74 илјади денари, еве како…

На 09.12.2025 во 14:45 часот во СВР Скопје, 44-годишен маж од скопско пријави дека во септември 2025 година бил измамен од Б.Н. и Р.„Н“ за сума од 74.000 денари.

Според пријавеното, парите им ги дал да купат материјал од стовариште и да ги довршат градежните работи во неговата куќа, а откако дознал дека материјалот во стовариштето воопшто не е платен, а Б.Н. избегнувал контакт со него, сфатил дека е измамен.

Се преземаат мерки за расчистување на случајот.

Црна Хроника

Приведен маж од кумановско, го пукал пријателот со пушка

Жител на липковското село Опае е уапсен откако со воздушна пушка го застрелал својот пријател од Куманово, информираше денеска СВР Куманово.

Инцидентот се случил вчера околу 18:40 часот на улицата „Карл Маркс“ во Куманово. Според првичните информации, Б.А. (45) со истрел од воздушна пушка го погодил неговиот пријател Б.Ш. (53), кој по нападот добил тешки телесни повреди.

Полицијата веднаш интервенирала и го лишила од слобода осомничениот. За случајот е известен јавен обвинител, а по целосно документирање, против Б.А. ќе биде поднесена соодветна кривична пријава.

Црна Хроника

Трагична сообраќајка на автопатот Скопје – Велес: Пет повредени, едно лице со тешки повреди

На автопатот Скопје – Велес, кај клучка Илинден, патничко возило „фолксваген пасат“ управувано од 19-годишниот Л.А. од Скопје излета од коловозот, при што пет лица се повредени.

Сопатникот С.А. се здоби со тешки повреди, додека возачот Л.А. и сопатниците Ф.А., Е.А. и Н.А. имаат телесни повреди. Сите повредени се хоспитализирани во Комплексот клиники „Мајка Тереза“ и во Градската општа болница „Св. Наум Охридски“.

Увидна екипа од СВР Скопје изврши увид на местото на несреќата, а причините за излетувањето се во тек на расчистување.