Скопје

Ѓорѓиевски со уште една мерка за младите: Општина Кисела Вода ќе субвенционира возачки дозволи за матуранти

Градоначалникот на Општина Кисела Вода, Орце Ѓорѓиевски, продолжува со реализирање на мерки што директно им помагаат на младите. Овој пат, општината воведува финансиска поддршка од 10.000 денари за матурантите кои сакаат да полагаат за возачка дозвола од „Б“ категорија.

Субвенциите се наменети за сите ученици од генерацијата 2025 година кои ќе се запишат или веќе се запишале во лиценцирана автошкола за теоретска и практична обука почнувајќи од 1 јануари 2025 година. Буџетот за оваа мерка изнесува 4 милиони денари, а јавниот повик ќе трае сè до исцрпување на средствата.

„Обезбедувањето возачка дозвола е значаен чекор кон поголема самостојност, мобилност и конкурентност на младите на пазарот на трудот. Преку оваа мерка, не само што ја олеснуваме финансиската тежина врз семејствата, туку и поттикнуваме безбедно и законско учество во сообраќајот“, истакна Ѓорѓиевски.

За да ја искористат оваа можност, матурантите треба да бидат жители на Кисела Вода и да приложат потврда дека се во последна година од своето средно образование.

Оваа иницијатива е уште еден доказ за посветеноста на локалната самоуправа кон младите. Со оваа финансиска поддршка, Општина Кисела Вода не само што помага во стекнување нови вештини, туку и придонесува за поголема безбедност на улиците.

Линк до јавниот повик: ТУКА.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.