Свет

Москва се огласи после состанокот на Путин и Виткоф: Што е договорено во моментов?

Кремљ потврди дека во четвртокот навечер се одржал состанок помеѓу претседателот на Русија, Владимир Путин, и Стив Виткоф, специјален пратеник на американскиот претседател Доналд Трамп.

Портпаролот на Кремљ, Дмитриј Песков, изјави дека е договорен разговор меѓу Путин и Трамп, но не и времето за одржување на разговорот.

„Точно време за кога ќе се одржи разговорот уште не е договорено“, рече Песков.

„Откако господин Виткоф ќе ги пренесе сите информации што ги добил во Москва на својот претседател, тогаш ќе го одредиме времето на разговорот“, додаде Песков и нагласи дека „постојат разбирања“ во двете земји дека „разговорот помеѓу претседателите е неопходен“.

Песков изјави и дека има причини за внимателен оптимизам во врска со решавањето на ситуацијата во Украина. Потсетуваме, претходно американскиот советник за национална безбедност, Мајк Волц, изјави дека Вашингтон со внимателен оптимизам гледа на можностите за решение на украинскиот конфликт и дека ќе се донесат одлуки за следните чекори врз основа на информациите од специјалниот пратеник Стив Виткоф, кој ја посети Москва.

„Секако, постојат причини за внимателен оптимизам“, изјави Песков за новинарите, коментирајќи ги зборовите на Волц.

Тој истакна и дека Русија добила дополнителни информации од САД за Украина.

Песков повтори дека „Путин го поддржува ставот на претседателот на САД, Доналд Трамп, за решавање на ситуацијата во Украина“, но исто така изнел некои прашања на кои треба заедно да се одговори.

„Вчера слушнавте многу важна изјава од претседателот Путин. Одговарајќи на прашањето на новинарите, тој рече дека го поддржува ставот на претседателот Трамп за решавање на конфликтот, но исто така изнел некои прашања на кои треба заеднички да се одговори. Значи, да, навистина, многу работи треба да се направат, но сепак, претседателот изрази солидарност со ставот на господинот Трамп“, рече Песков.

Свет

Брисел подготвува строги казни за мигрантите – земјите-членки под притисок

Брисел – Земјите-членки на Европската унија се подготвуваат да поддржат значително заострување на миграциската политика, вклучувајќи воспоставување „центри за враќање“ на мигранти надвор од територијата на ЕУ.

Министрите за внатрешни работи денеска во Брисел ќе гласаат за предлозите на Европската комисија, кои предвидуваат построги казни за мигранти со одбиени азилски барања, враќање во „безбедни земји“ и принудно напуштање на територијата на ЕУ. Дополнително, пакетот вклучува распределба на најмалку 30.000 баратели на азил меѓу земјите-членки, при што земјите што нема да примаат мигранти ќе плаќаат по 20.000 евра за секое лице.

И покрај намалувањето на нелегалните влегувања за околу 20% оваа година, европските влади се под притисок да преземат акција, особено поради растот на крајнодесничарските партии. Данска и неколку други земји силно го поддржуваат пакетот, додека Франција и Шпанија го доведуваат во прашање легалитетот и ефективноста на предложените мерки.

Активистите предупредуваат дека новите мерки можат да го зголемат ризикот и правната неизвесност за мигрантите, додека ЕУ се обидува да постигне компромис до крајот на годината во услови на политички чувствително прашање.

Свет

Половина Киев без струја по руски напади врз енергетскиот систем

Киев – Околу половина од населението на украинскиот главен град Киев денес остана без електрична енергија по најновите руски напади врз енергетската инфраструктура на земјата, соопшти Министерството за енергетика.

„Ситуацијата во Киев е една од најтешките – околу 50 проценти од потрошувачите во градот се без струја“, се наведува во официјалното соопштение на Телеграм.

Русија го зголеми бројот и интензитетот на нападите врз гасните и енергетските постројки на Украина, насочувајќи ги кон централи за производство на електрична енергија и далноводи. Трите украински нуклеарни централи, кои произведуваат повеќе од половина од електричната енергија на земјата, беа принудени да го намалат производството поради оштетувања на далноводите.

Како резултат, операторот на електричната мрежа, Укренерго, ги ограничи испораките на електрична енергија, оставајќи цели региони без струја. Прекините влијаат и на греењето и снабдувањето со вода, а жителите на Киев и околината во изминатата недела добиваат електрична енергија околу десет часа дневно.

Свет

Мерц: „Не ни требаат САД за да ја заштитиме демократијата во Европа“

Германскиот канцелар Фридрих Мерц жестоко ги отфрли критиките на САД кон Европската Унија, изразени во неодамна објавената Стратегија за национална безбедност на Вашингтон.

„Не ни требаат Американците за да ја спасиме демократијата во Европа“, рече Мерц, додавајќи дека делови од документот се „неприфатливи“ за Европа.

Изјавата доаѓа во време на интензивни дипломатски напори меѓу САД и ЕУ за наоѓање заедничка основа за решавање на конфликтот во Украина, како и по неодамнешната казна на Европската комисија против компанијата за социјални медиуми X, која предизвика реакции од американската страна.

Во документот на САД се предупредува на економски пад и „цивилизациско уништување“ на Европа, предвидувајќи дека континентот може да стане „непрепознатлив за 20 години или помалку“ ако сегашните трендови продолжат.

Мерц, пак, истакнува дека Европа има капацитет и ресурси сама да ја заштити својата демократија и безбедност, нагласувајќи ја независната улога на континентот во глобалната политика.