Андреј Ѓоргиески од бендот ДНК го загуби животот во трагичната несреќа во пожарот во дискотеката во Кочани, спасувајќи други животи.

По трагедијата која ја потресе Македонија неговите пријатели се збогуваат на социјалните мрежи.

Пејачот Спасен Силјановски со емотивна објава на социјалните мрежи раскажа случка со Андреј. Објавата ви ја пренесуваме во целост:

“Ми се јави на телефон и ми вели: Батко Спасен чувајми масичка ќе дојдам вечер на свирка кај тебе….Јас му одговарам: Абе брат шо бараш, нема да ти се допадне. Ти си урбан лик а јас сум фолк тип. Не братко Спасен, ние сме слични, двајцата сме го поминале истиот трнлив пат до успехот. Ти од Кичево, а јас од Дебар, ние мора да се држиме и да се помагаме…Така и бидна, вечерта се појави во ресторанот, го замолив да ни испее нешто од неговиот репертоар. Без двоумење го зеде микрофонот и ги дигна сите на нозе. Е тоа беше тој Андреј. Човек во вистинска смисла на зборот. Другар, искрен, чесен, патриот, хуманитарец. Беше херој и замина како херој.”, стои во објавата на Спасен Силјановски.

Студентката по медицина Стефанија Соколовa меѓу жртвите од пожарот во кочанската дискотека

Стефанија Соколовa, студент по медицина и активен член на кочанскиот Црвен крст е една од загинатите во пожарот што избувна во клубот „Пулс“ во кој досега загинаа 59 лица, а 163 се повредени.

Помеѓу стотиците објави на социјалните мрежи во потрага по исчезнати млади момчиња и девојки кои биле во дискотеката таа кобна вечер, се појавил и апел за Стефанија. Од неа немаше ни трага ни глас, па нејзините роднини, пријатели и познаници панично и загрижени бараа каква било информација.

Веста не беше ветувачка, со оглед на тоа што таа не се јавуваше на мобилниот телефон, а не беше ниту во болниците каде се превезуваа повредените…

Драмата што ја доживеаја со стотици други загрижени членови на семејството ќе им остане засекогаш врежана во сеќавањата, но болката во градите откако дознаа дека нивната Стефанија е на црната листа на жртви, вечно ќе ги следи.

Детали за нејзината смрт се уште не се познати. На социјалните мрежи може да се прочитаат бројни срцепарателни простувања со Стефи, како што ја нарекуваа.
„Девојко наша, гледај нè одозгора. Помагај им на сите, исто како што правеше овде. Лекувај ги сите со рацете, но и со душата. Тоа е она што го правеше најдобро. Облечи ја твојата носија и танцувај, а ние ќе плачеме, не замерувај ни. Засекогаш ќе сме тажни по тебе“, стои во едно од збогувањата, придружено со фотографија на која Стефанија позира со насмевка. Од неа се простија и нејзините колеги од Црвен крст Кочани.

„Сакаше дружење, помагање на луѓето и медицина, а нејзината светла иднина беше прекината на 16 март, три часа по полноќ, кога избувна пожар на настап на групата ДНК.

Македонија поради трагедијата е во седумдневна жалост.

Извор: Женски Магазин 

Моника Спасова, млада инспекторка и мајка на едногодишно девојче загинала во пожарот што избувна во неделата во кочанската дискотека. Моника е, за жал, една од 59-те невини жртви.

Нејзиното семејство, откако слушнало за трагедијата во ноќниот клуб, ја барало по сите болници. Нејзината фотографија ја објавија на социјалните мрежи со молба граѓаните да ги контактираат доколку имаат информации за неа. Апелот бил споделен со молскавична брзина на профилите на пријатели, познаници и други корисници на социјалните мрежи кои сакале да помогнат во апелот. Меѓутоа, во еден момент стигна најмрачната вест дека Спасова е една од жртвите.

„Мајкино око оти ми побегана. Не можам да живеам без тебе. Мајкино око кој ќе гушнам место тебе? Мајкино око, душата ми е распарчена“, напиша неутешната мајка на Моника. Спасова зад себе ги остави ќерката, сопругот, родителите, како и брат и сестра.

Според објавите на социјалните мрежи, Моника дипломирала на криминалистичката академија во јануари минатата година.

– Нашата убава Мони. Животот не е фер. Нека почива во мир. Чувајте се сите, треба да ги преживееме овие тешки денови, гласи една од бројните коментари под објавата.

Како што може да се види на профилот на неутешната жена, пред еден месец приредиле голема забава за роденденот на ќерката на Моника