До април 2027 година ќе може да се патува без дозвола за патување во Европската Унија кога европски систем за информации и овластување за патување (ETIAS) ќе стане задолжителен во повеќето земји од Шенген зоната, објави „Schengen,News“

Ова е трето одложување на примената на овој систем. Системот првично беше најавено дека ќе се применува од почетокот на 2022 година, но се соочи со низа одложувања, а последниот датум беше мај 2025 година.

Според Генералниот директорат за миграција и внатрешни работи на ЕУ, ЕТИАС системот се очекува да биде готов дури во октомври 2026 година и треба да почне да се применува 6 месеци по воведувањето на системот за за влез/излез (ЕЕС).

Ќе има преоден и грејс период, на секои шест месеци, што значи дека ETIAS ќе стане задолжителен за мнозинството земји во април 2027 година и целосно задолжителен во октомври 2027 година.

Имплементацијата на ETIAS е поврзана со онаа на системот за влез/излез (ЕЕС) кој по повеќето одложувања, ЕУ се согласи постепено да го воведува од октомври годинава. Постепеното спроведување на ЕЕС значи дека земјите-членки ќе можат постепено да го лансираат новиот граничен систем во период од шест месеци.

Доколку ЕУ одлучи да го воведе ЕЕС во октомври 2025 година, земјите-членки ќе треба да регистрираат 10% од патниците кои ја преминуваат границата по првиот месец.

Во текот на првите 60 дена, системот може да работи без биометриски функционалности. Сепак, по три месеци, во јануари 2026 година, сите земји-членки треба да управуваат со ЕЕС со биометриски функционалности, а во април 2026 година треба да биде завршено воведувањето на ЕЕС.

Штом EES е целосно ќе биде имплементиран, ETIAS ќе почне да се применува. Планиран е преоден период за примена и на овој систем кој ќе трае од октомври 2026 година до април 2027 година. Во овој период патниците ослободени од виза треба да аплицираат за ETIAS, но ќе им биде дозволен влез во Шенген зоната дури и без дозвола за патување и престој под услов да ги исполнуваат другите критериуми за влез.

По шестмесечниот преоден период, во април 2027 година, ETIAS ќе стане задолжителен за сите, освен за оние кои влегуваат во ЕУ за прв пат по завршувањето на преодниот период. Оваа група патници ќе има грејс период од шест месеци, до октомври 2027 година.

Имајќи ги предвид овие пресметки ETIAS ќе стане задолжителен за мнозинство во април 2027 година и целосно задолжителен за сите патници ослободени од виза во октомври 2027 година.

Почнувајќи од денот на примената на ЕТИАС системот околу 1,4 милијарди луѓе од 59 земји и територии ослободени од визи треба да имаат одобрение за патување за да влезат во 30 европски земји на краток престој до 90 дена во период од 6 месеци. Овие правила нема да важат за Ирска и Кипар, како и за Лихтенштајн, Норвешка, Исланд и Швајцарија. Регулативите ќе важат за патници и од Америка, Австралија, Велика Британија, Украина, Јапонија, Бразил, Аргентина, но и земјите од Западен Балкан, како Србија, Црна Гора, Босна и Херцеговина, Северна Македонија и Албанија.

ЕТИАС ќе важи три години, а во тој период ќе бидат дозволени неограничен број посети на овие земји. Ќе биде поврзана со пасошот на патникот, па кога ќе истече патниот документ, потребно е да се аплицира за нова дозвола.

Рускиот претседател Владимир Путин синоќа изјави дека треба да се разгледа опцијата за привремено ставање на Украина под администрација на Обединетите нации (ОН) за да се овозможи организирање нови избори во земјата.

Тој нагласи дека ваква практика постои и дека може да се разгледа можноста за привремена администрација на ОН, во соработка со САД, европските земји, како и со партнерите и пријателите на Русија.

Путин објасни дека целта на оваа идеја е да се спроведат демократски избори кои ќе доведат до формирање влада способна да изврши мировен договор. По тоа, според него, ќе започнат преговори за мировен договор, кои ќе доведат до потпишување на легитимни документи признати на меѓународно ниво и кои ќе обезбедат безбедност и стабилност.

Русија досега постојано се обидуваше да го оспори легитимитетот на украинскиот претседател Володимир Зеленски. Редовниот мандат на Зеленски ќе истече во мај 2024 година, но избори не можат да се одржат поради воената состојба која е во сила три години. Путин исто така постојано користи нацистички референци и реторика од Втората светска војна за да ја оправда инвазијата, иако Зеленски е Евреин.

Во февруари, украинскиот парламент усвои резолуција која потврдува легитимитет на Зеленски со јасно мнозинство. Многумина во Украина сметаат дека изборите под сегашните услови на конфликт би биле нефер и непрактични, бидејќи не би можело да се обезбеди учество на војниците и раселените лица.

На меѓународно ниво, Зеленски продолжува да биде признат како легитимен претседател. Путин исто така повтори дека Русија претпочита мирно решение на конфликтот, но не на сметка на Украина. Тој истакна дека е подготвен да преговара, вклучително и со Европјаните, но дека Русија не дозволува да биде измамена.

Во воена смисла, Путин е убеден во победата на Русија, која веќе го контролира 99% од Луганската област и над 70% од областите Доњецк, Херсон и Запорожје, кои Москва ги анектираше.

Додека Русија со САД преговара за воспоставување мир во Украина, технички експерти откриле дека Москва го засилува производството на дронови, а обуката на оператори на беспилотни летала покажува дека плановите за нивна примена не се воопшто поврзани со долготрајниот мир.

„Киев пост“ го пренесе истражувањето на повеќе центри за техничка анализа и организации за човекови права кои ги следеле активностите на руските државни структури на украинските територии под контрола на Русија.

Во истражувањето се наведува дека алармантните заклучоци укажуваат на тоа дека Русија, наместо да се подготвува за мир, продолжува да обучува воени специјалисти за операции со сѐ поголеми и поголеми размери.

Истражувањето е фокусирано на рускиот процес на регрутирање млади луѓе за потребите на воената индустрија и вооружените сили на овие територии.

Наведено е дека на териториите што ги контролира Москва, Украинците се принудени да се приклучат на овие операции, а на училиштата и индустриската инфраструктура им се менува намената, со што се воведува воена милитаризација во образовните програми.

Според истражувањето, Русија планира во наредните пет години да обучи повеќе оператори на нападни дронови отколку бројот на пешадиските војници што Русија моментално ги има на располагање.

Извештајот исто така покажува дека во јуни 2023 година, со владин декрет под наслов „Стратегија за развој на беспилотната авијација до 2035 година“, Русија наредила зголемување на уделот на домашно произведените дронови на 70%, со цел да се намали зависноста од иранските и кинеските компоненти.

Со истиот декрет беше побарано проширување на програмата за обука на оператори и зголемување на бројот на различни типови дронови на 250 видови.

Процесот веќе започнал во повеќе клучни области, а за оваа програма се издвоени вкупно 546 милијарди рубли (околу шест милијарди долари).

Во програмата учествуваат водечките руски универзитети како Инополи, МИПТ, МАИ и Бауман Московскиот државен технички универзитет. Образовните програми вклучуваат до 256 часа обука за управување со дронови по лице.

Покрај тоа, руските училишта веќе добиле учебници за ученици од 8. и 9. одделение во кои се објаснуваат основите на конструкцијата на беспилотни летала и управувањето со нив.

Максим Бученко, еден од авторите на истражувањето, истакнал дека 90% од приватните училишта во Русија сега примаат државна помош за развој на образовните програми фокусирани на изградба и управување со дронови.

„Ако го вклучиме целокупниот број на образовни, воени и други специјалисти, Русија има за цел да обучи 1,5 милиони оператори на беспилотни летелки. Не е сигурно дали ќе успеат да го постигнат тоа, но плановите се поставени и средствата се обезбедени“, рекол Бученко.

Павло Лиљански, директор на Институтот за стратешки студии и безбедност, навел дека веќе 167.000 дронови се купени за потребите на образованието во школите, а 290 аеродроми во Русија се прилагодени за обука на управување со беспилотни летала.